საქართველოს ოპოზიციურმა პოლიტიკურმა პარტიებმა საკონსტიტუციო რეფორმის პროცესში კონსენსუსის მიღწევასთან დაკავშირებით ერთობლივი განცხადება გაავრცელეს.

განცხადებაში ნათქვამია, რომ განცხადებაზე ხელმომწერი პოლიტიკური პარტიები, პროპორციული საარჩევნო სისტემის სხვადასხვა კომპონენტებთან დაკავშირებით (საარჩევნო ბარიერი, საარჩევნო ბლოკები და ა.შ.) კონსესუსის მისაღწევად, ქართულ ოცნებასთან დიალოგისთვის მზად არიან.

განცხადებაში ნათქვამია, რომ დიალოგის დაწყებამდე ხელისუფლებამ უნდა აღადგინოს მისსავე მიერ შემოთავაზებული კონსტიტუციური რეფორმა, რომ 2020 წლის საპარლამენტო არჩევნები ქვეყანაში ჩატარდება სრულად პროპორციული საარჩევნო სისტემით:

"თუ ქართული ოცნების ხელისუფლებას მართლაც სურს საკონსტიტუციო ცვლილებების მაღალი ხარისხის საზოგადოებრივ - პოლიტიკური თანხმობის პირობებში განხორციელება და შესაბამისად, მის მიერ ჩიხში შეყვანილი კონსტიტუციური რეფორმის გადარჩენა, ის უპირობოდ უნდა დაუბრუნდეს მის მიერვე შემოთავაზებულ თავდაპირველ პოლიტიკურ მოცემულობას, რომ 2020 წლის საპარლამენტო არჩევნები ჩატარდება მთლიანად პროპორციული სისტემით".

განცხადებაში ასევე აღნიშნულია, რომ ქართული ოცნების ხელისუფლებამ მზაობა უნდა განაცხადოს იმის თაობაზე, რომ საარჩევნო სისტემის უმნიშვნელოვანეს კომპონენტთან, ე.წ. გაუნაწილებელი მანდატების განაწილების წესთან დაკავშირებით გადაწყვეტილება მიღებული იქნება მოლაპარაკების პროცესში ჩართულ სუბიექტებთან მიღწეული კონსესუსის შესაბამისად.

ოპოზიციური პარტიებს მიაჩნიათ, რომ პრეზიდენტის საყოველთაო პირდაპირი არჩევის წესი უნდა შენარჩუნდეს და რადგან ქართულ ოცნებას ამასთან დაკავშირებით განსხვავებული პოზიცია აქვს, მიზანშეწონილად მიიჩნევენ, რომ ადგილობრივი არჩევნების პარალელურად პლებისციტი ჩატარდეს, რათა მოსახლეობის აზრიც იქნას გათვალისწინებული.

განცხადების ხელმომწერი პარტიები:

  • ახალი საქართველო;
  • ევროპული საქართველო - მოძრაობა თავისუფლებისთვის;
  • ერთიანი ნაციონალური მოძრაობა;
  • ეროვნულ-დემოკრატიული პარტია;
  • თავისუფალი დემოკრატები;
  • მოძრაობა სახელმწიფო ხალხისთვის;
  • სამოქალაქო ალიანსი თავისუფლებისთვის;
  • საქართველოს დემოკრატიული პარტია.

15 აგვისტოს, ქართული ოცნების ლიდერმა არჩილ თალაკვაძემ კვალიფიციურ ოპოზიციურ პარტიებს, მომდევნო კვირაში შეკრება და საკონსტიტუციო რეფორმაზე მსჯელობის განახლება შესთავაზა.

თალაკვაძის თქმით, მმართველი გუნდი მზადაა საშემოდგომო სესიამდე დარჩენილი დრო გამოიყენოს პოლიტიკური დიალოგისთვის.