სლოვაკეთის პრემიერ-მინისტრმა, რობერტ ფიცომ, Aktuality.sk-ის მთავარ რედაქტორს, პეტერ ბარდის, სასამართლოში უჩივლა. საჩივრის მიზეზი ბარდის ბესტსელერი გახდა, სახელწოდებით "ფიცო — ძალაუფლებით შეპყრობილი". სლოვაკეთის პოპულისტ პრემიერს წიგნის შინაარსთან პრობლემა არ აქვს, საჩივარი ფოტოს უნებართვო გამოყენებისთვისაა შეტანილი. ფიცოს საქციელს ქვეყანაში ბევრი კრიტიკოსი გამოუჩნდა, რადგან ეს სლოვაკეთის თანამედროვე ისტორიაში ჟურნალისტის წინააღმდეგ აღძრული ყველაზე მაღალპროფილური საქმეა.

ბარდმა სარჩელის შესახებ 10 ოქტომბერს განაცხადა. როგორც ჩანს, სარჩელის სამიზნე მასთან ერთად წიგნის გამომცემელი Ringier Slovakia Media-ც არის.

"ჩვენ დარწმუნებულები ვართ, რომ კანონი არ დაგვირღვევია, რასაც სასამართლოზე დავამტკიცებთ. ჩვენ სამართლიანი სასამართლოს იმედი გვაქვს", — განაცხადა ბარდმა.

პრემიერ-მინისტრს მედიასთან დიდი ხანია, ცუდი ურთიერთობა აქვს. გასულ წელს ფიცომ Aktuality.sk ე.წ მტრულად განწყობილ მედიათა სიაში შეიყვანა, რომელთა კითხვებსაც არ პასუხობს.

Aktuality.sk-ის ცნობით, ეს უდიდესი სასამართლო საქმეა, რომელიც სლოვაკეთის თანამედროვე ისტორიაში ჟურნალისტის წინააღმდეგ აღიძრა. პრემიერი ბოდიშსა და €100,000-ს ითხოვს გამომცემლისა და ავტორისგან.

"თუ მათ სურდათ, რომ ამ სარჩელით შევეშინებინე და თვითცენზურა გამოეწვიათ, ეს არ გამოუვიდათ", — განაცხადა წიგნის ავტორმა.