2025 წლის 1 იანვრიდან რუსი მესაზღვრეები სომხეთისა და ირანის საზღვარზე არსებულ საგუშაგოზე მუშაობას შეწყვეტენ. გადაწყვეტილება რუსეთის პრეზიდენტის, ვლადიმერ პუტინისა და სომხეთის პრემიერ-მინისტრის, ნიკოლ ფაშინიანის შეხვედრაზე იქნა მიღებული, — ამის შესახებ რუსული მედია წერს.

ამას გარდა, შეხვედრაზე ფაშინიანმა პროგრამა "მშვიდობის გზაჯვარედინი" წარმოადგინა. ეს ერევნის მიერ შემოთავაზებული ალტერნატივაა ზანგეზურის სატრანსპორტო დერეფნის, რომელიც სომხეთის სიუნიკის რეგიონის ტერიტორიაზე გადის და აზერბაიჯანს ნახიჩევანის ავტონომიურ რესპუბლიკასთან აკავშირებს. გეგმის თანახმად, სომხეთზე, თურქეთზე, აზერბაიჯანსა და ირანზე გამავალი სატრანსპორტო კომუნიკაცია რუსეთის მონაწილეობის გარეშე, თითოეული ქვეყნის სუვერენიტეტისა და იურისდიქციის ქვეშ იფუნქციონირებს.

31 ივლისს ერევნის ზვარტნოცის აეროპორტში რუსმა მესაზღვრეებმა სამსახური დაასრულეს. ეს სომხეთის უშიშროების საბჭომ მარტში მოითხოვა.