საქართველოს პრეზიდენტი სალომე ზურაბიშვილი, ორბელიანების სასახლეში, ოპოზიციურ პარტიებთან კონსულტაციებს მართავს.

როგორც ცნობილია, შეხვედრაზე "ქართულ ქარტიასა" და სალომე ზურაბიშვილის მიერ შერჩეულ პრემიერ-მინისტრობის კანდიდატზე ისაუბრებენ, რაზეც პრეზიდენტმა განცხადება რამდენიმე დღის წინ გააკეთა.

არსებული ინფორმაციით, შეხვედრაზე, სალომე ზურაბიშვილი კოალიციის ლიდერებს: ნიკა გვარამიას, ნიკა მელიას, ელენე ხოშტარიას და ზურაბ ჯაფარიძეს ე.წ. ტექნიკური მთავრობის წევრებსა და პრემიერ-მინისტრობის შესაძლო კანდიდატს დაუსახელებს.

"ორშაბათს მინდა დავიწყო პარტიებთან შეხვედრები, იმისთვის, რომ არჩევნებამდე ცოტა დროა დარჩენილი და დავიწყოთ მოლაპარაკებები კონკრეტულ კანდიდატურებთან დაკავშირებით. პარტიებს ექნებათ საშუალება, რომ წარადგინონ მინისტრობის კანდიდატურები. პოლიტიკოსები, ჯერჯერობით, ამ ეტაპზე — არა. პრემიერობის კანდიდატურა მყავს შერჩეული, ამ ნიშნით - პროფესიონალი, სანდოობით აღჭურვილი, მე მგონი ყველასთვის მისაღები", — განაცხადა სალომე ზურაბიშვილმა ტვ პირველთან ინტერვიუში.