ოკუპირებული ცხინვალის საპატიმროდან აპრილში უკანონოდ დაკავებული რამაზ ბეღელური გაათავისუფლეს. ის სოფელ გუგუტიანთკარის მკვიდრია. დე ფაქტო უშიშროების კომიტეტის ცნობით, რამაზ ბეღელური ე.წ საზღვრის დარღვევისთვის აპრილში დააკავეს, ხოლო ივნისში 8-თვიანი პატიმრობა მიუსაჯეს.

4 ოქტომბერს მისი უკანონო პატიმრობის ვადა ამოიწურა, და კაგებეს ცნობით, ამ მიზეზით გათავისუფლდა.

ოკუპირებულ ცხინვალში, ადგილობრივი კანონმდებლობის მიხედვით, მსჯავრდებულებს ციხეში გატარებული ორი დღე სამ დღედ ეთვლებათ.

რამაზ ბეღელურის გათავისუფლება დაადასტურა საქართველოს სახელმწიფო უსაფრთხოების სამსახურმაც. უწყების ცნობით, რამაზ ბეღელურის უკანონო პატიმრობიდან გათავისუფლების პროცესში აქტიურად გამოიყენებოდა როგორც საქართველოში ევროკავშირის მონიტორინგის მისიის (EUMM) უშუალო ჩართულობით მოქმედი „ცხელი ხაზის“ მექანიზმი, ისე ცენტრალური ხელისუფლების ხელთ არსებული ყველა რელევანტური ინსტრუმენტი.

ამჟამად ოკუპირებული ცხინვალის ციხესა და წინასწარი დაკავების იზოლატორში საქართველოს 10 მოქალაქე რჩება.