საერთაშორისო გამჭვირვალობა — საქართველო (TI) მორიგ კვლევას აქვეყნებს მმართველ პარტიასთან დაკავშირებული მაღალჩინოსნის საეჭვო ფინანსურ სქემებზე.

TI-ის კვლევაში ვკითხულობთ, რომ ეგვიპტის არაბთა რესპუბლიკაში საქართველოს საგანგებო და სრულუფლებიანი დესპანი მიხეილ თიგიშვილი და მისი მეუღლე, ნარგიზა ჭავჭანიძე ჩართულნი არიან 20 კომპანიის მართვაში, ფლობენ წილებს, მაგრამ არცერთ მათგანს 2024 წელს შევსებულ ქონებრივ დეკლარაციაში ეს ინფორმაცია არ აუსახავთ.

დესპანის ოჯახს ასევე უკავშირდება საგარეჯოში თავისუფალი ინდუსტრიული ზონის შექმნის შეუსრულებელი ვალდებულებაც — სახელმწიფომ 111 ჰექტარზე მეტი მიწის ნაკვეთი სწორედ ამ მიზნით გადასცა კომპანიას, რომლის 20%-ს ფლობს მიხეილ თიგიშვილის შვილი, დურმიშხან თიგიშვილი.

დესპანის ოჯახს ლიცენზიებიც აქვს აღებული წიაღისეულის მოპოვებაზე;

მიხეილ თიგიშვილის მეუღლემ, ნარგიზა ჭავჭანიძემ კომპანია "დეენკა პრომაინინგი" 2021 წლის 29 ივლისს დაარეგისტრირა. 12 დღის შემდეგ, 2021 წლის 10 აგვისტოს, სსიპ "მინერალური რესურსების ეროვნულმა სააგენტომ" ამ კომპანიას 3-წლიანი ლიცენზია მისცა, რის საფუძველზეც ლიცენზიანტს ქედის მუნიციპალიტეტის სოფელ ქვედა მახუნცეთის მიმდებარე ტერიტორიაზე, მდინარე აჭარისწყალზე 111,440 კუბური მეტრი ქვიშა-ხრეშის მოპოვების უფლება ჰქონდა.

ინერტული მასალის მოპოვების შედეგად, მიმდებარედ, მდინარე აჭარისწყალზე მოწყობილ ხიდის საძირკვლებს/საყრდენ ბურჯებს საფუძველი გამოეცალა და ასევე საფრთხე შეექმნა მაღალი ძაბვის გადამცემ ბოძებს, რაც შეუიარაღებელი თვალითაც ნათლად ჩანს.

ლიცენზია ალტ ინფოსთან დაკავშირებული პირებისთვის;

კიდევ ერთი კომპანია, რომელსაც 14-წლიანი ლიცენზია მისცა სსიპ "მინერალური რესურსების ეროვნულმა სააგენტომ", არის "ფორვარდ მაინინგი". ამ კომპანიის დამფუძნებელი და 42,5% წილის მფლობელი ილია ცანავა არის ეგვიპტეში საქართველოს დესპანის, მიხეილ თიგიშვილის შვილის, დურმიშხან თიგიშვილის ბიზნესპარტნიორი შპს "აიდი გლობალში". შპს "ფორვარდ მაინინგმა" უფლება მიიღო, 114,595 კუბური მეტრი ბაზალტი მოიპოვოს ქობულეთის მუნიციპალიტეტის სოფელ კვირიკეს მიმდებარე ტერიტორიაზე. ილია ცანავა ამვდროულად, 2014 წლიდან არის პრორუსული, ულტრამემარჯვენე, ძალადობრივი მოწოდებებით ცნობილი ალტ-ინფოს ლიდერის, აშშ-ის მიერ სანქცირებული კონსტანტინე მორგოშიასა და მისი მამიდის, ციალა მორგოშიას, ბიზნესპარტნიორი შპს "გრანდე გრუპ ჯორჯიასა" (ს/კ 405078277)) და შპს "გრანდე გრუპ ჯორჯიაში" (ს/კ 405062649).