სომხეთის პრემიერ-მინისტრი ნიკოლ ფაშინიანი აცხადებს, რომ რუსეთის შექმნილი კოლექტიური უსაფრთხოების ხელშეკრულების ორგანიზაციის (ОДКБ) წევრობა სომხეთს პრობლემებს უქმნის, – ამის შესახებ რუსული პრესა წერს.

"ვამბობდი, რომ ნაცვლად იმისა, რომ ოდკბ ასრულებდეს უსაფრთხოების სფეროში თავის ვალდებულებებს სომხეთის წინაშე, პირიქით, სომხეთისთვის პრობლემებს ქმნის", — ამის შესახებ რუსული პრესა წერს.

ფაშინიანის განცხადებით, სომხეთმა ამ ორგანიზაციაში წევრობა იმიტომ გაყინა, რომ არ ესმის, რატომ უნდა მიიღოს მონაწილეობა მის მუშაობაში, როცა ოდკბ-ს, ერევნის თხოვნის მიუხედავად, არ აუხსნია, რაში მდგომარეობს მისი პასუხისმგებლობა სომხეთთან დაკავშირებით.

"ოდკბ-ში ჩვენი წევრობა გავყინეთ არა მარტო იმიტომ, რომ ეს ორგანიზაცია არ ასრულებს ნაკისრ ვალდებულებებს სომხეთის უსაფრთხოების დაცვის კუთხით, არამედ მეტიც - თავად წარმოადგენს საფრთხეს ჩვენი უსაფრთხოებისთვის, სომხეთის მომავალი არსებობისთვის, ჩვენი სუვერენიტეტისა და სახელმწიფოებრიობისთვის", — განაცხადა ფაშინიანმა სრულიად სომეხთა ფორუმზე სიტყვით გამოსვლისას.

მანამდე სომხეთმა უარი თქვა კოლექტიური უსაფრთხოების ხელშეკრულების ორგანიზაციის (CSTO CRRF) მიერ მოწყობილ წვრთნებში მონაწილეობაზე. წვრთნები ყირგიზეთში 3-დან 15 სექტემბრამდე გაიმართება.

მისივე თქმით, სომხეთი აპირებს, განავითაროს თანამშრომლობა ევროკავშირთან, ასევე თურქეთსა და საქართველოსთან, თუმცა ამავდროულად ეცდება, არ გაწყვიტოს ეკონომიკური კავშირები რუსეთთან და რუსეთის ეგიდით მოქმედ „ევრაზიის ეკონომიკურ კავშირთან“.