მოქალაქეების ლიდერი, ალეკო ელისაშვილი ძლიერი საქართველოსა და გახარია — საქართველოსთვის პოლიტიკური გაერთიანების შესახებ დისკუსიას გამოეხმაურა და განაცხადა, რომ უნდა გაერთიანდეს ყველა, ვისაც ერთმანეთის გაძლიერება შეუძლია.

მოქალაქეები კოალიცია ძლიერ საქართველოში არსებული ოთხი პოლიტიკური გაერთიანებიდან ერთ-ერთია.

“ახლა არ ვართ ჩვეულებრივ წინასაარჩევნო გარემოში, ქვეყანა არის განსაცდელში, მტრებს უხდიან ბოდიშს, მტრულ სახელმწიფოში, რუსეთში მიგვაქანებენ და ოკუპანტს ეძახიან მეგობარს, კუდს უქიცინებენ და პირდაპირ აანონსებენ, რომ თუ ისინი დარჩებიან მეოთხე ვადით ხელისუფლებაში, ყველას დაიჭერენ. იმას კი არ გვპირდებიან, რომ ან სიმდიდრე გექნებათ, ან ქარხანას ავაშენებთო, როგორც ადრე გვატყუებდნენ. არა, ყველას დაგიჭერთო.

ასეთ ვითარებაში, როდესაც ქვეყანა რეალურ განსაცდელშია, ვფიქრობ, რომ ყველას, ვისაც შეგვიძლია, რომ ერთმანეთი გავაძლიეროთ, დავეხმაროთ ერთმანეთს ამათ დამარცხებაში, ყველამ ჩვენი ინტერესები გვერდზე უნდა გადავდოთ და მარტო ქვეყნისა წამოვწიოთ წინ. ყველა მხარემ ყველაფერი უნდა გავაკეთოთ, რომ ერთმანეთისკენ ნაბიჯები გადავდგათ”, — ამბობს ელისაშვილი.

მისი განმარტებით, ამომრჩევლისთვის ამ ორი პარტიის გაერთიანება იქნება "რეალურად ძლიერი პოლიტიკური ძალა" და "რეალურად ძლიერი ოპოზიციური კოალიცია".

თუ შევძელით და საბოლოოდ ერთმანეთს ხელი ჩამოვართვით, ეს იქნება ყველაზე დამანგრეველი, ბოლოსდაბოლოს, შევცვლით ქვეყანაში იმ რეალობას, რომ იყო ორი პოლუსი, ნაცები, ქოცები, 12 წელია ვისმენთ მათგან ერთმანეთის დამუნათებას. ამოვიდა ყელში, ჩვეულებრივ ადამიანებს, რომლებსაც არც ერთი უნდათ, არც მეორე, გაუჩნდათ არჩევანი “ძლიერი საქართველოს” სახით და უფრო მეტად გამსხვილების შემთხვევაში კიდევ უფრო ომახიანი იქნება ეს ჩვენი არჩევანი”, – აცხადებს ელისაშვილი.

ცნობისთვის, პირველი ძლიერი საქართველოსა და გახარია — საქართველოსთვის კოალიციაზე მამუკა ხაზარაძემ განაცხადა, რომელსაც შემდეგ საქართველოს პრეზიდენტი სალომე ზურაბიშვილი მოლაპარაკებების ინიციატივით გამოეხმაურა.

ხაზარაძისა და გახარიას მოლაპარაკება გუშინ, 17 სექტემბერს, პრეზიდენტის სასახლეში შედგა, რის შემდეგაც, პარტია ძლიერი საქართველოს ლიდერმა ერთი დღის ვადით საკითხის მოფიქრება სთხოვა.