პარტია ევროპული საქართველოს თბილისის მერობის კანდიდატი, ელენე ხოშტარია გეგმავს, რომ თვითმმართველობის არჩევნებამდე, თბილისის სხვადასხვა უბანში იცხოვროს. როგორც თავად ამბობს, ასეთი მეთოდით, ის უკეთ გაეცნობა ადგილობრივი მოსახლეობის პრობლემებს და ნდობას მოიპოვებს:

"ბევრი განსხვავებული აზრი მოვისმინე, მაგრამ მთავარი ჩემი არგუმენტი აქ იყო ის, რომ პროცესებს შეხედო ამ ადამიანების თვალით, არის ბევრად უფრო ფასეული, ვიდრე თუნდაც კონკრეტული პიარ შედეგი, რომელიც ამან შეიძლება მოიტანოს".

ელენე ხოშტარიას თქმით, დარჩენილ ორ თვეში, რამდენიმე დღით, აბსოლუტურად ყველა უბანში იცხოვრებს:

"იმ უბნის ჩვენს პარტიულ ოფისში ვიმუშავებთ, მთელი ჩემი შტაბი იქ იქნება. ყველა სპეციფიკურ ადგილას, ყველა პრობლემურ ადგილას მინდა რომ მოვახერხო ცხოვრება. რა თქმა უნდა, ეს არის წინასაარჩევნო კამპანიის ნაწილი, მაგრამ წარმოდგენა არ მაქვს კონკრეტულად საარჩევნოდ ახლა მე ეს რას მომიტანს".

საქართველოს პრეზიდენტის, გიორგი მარგველაშვილის განცხადებით, მთავრობასთან შეთანხმებით გადაწყდა, რომ თვითმმართველობის არჩევნები ოქტომბრის მესამე კვირის ბოლოს გაიმართება.