საქართველოს საგარეო საქმეთა სამინისტროში მიიჩნევენ, რომ რუსეთის პრეზიდენტის, ვლადიმერ პუტინის აფხაზეთში ვიზიტი ცინიკური ქმედება და საზღვრების ძალადობრივი ცვლილების დაკანონებაა. ასე გამოეხმაურა საგარეო საქმეთა სამინისტრო რუსეთის პრეზიდენტის ოკუპირებულ აფხაზეთში დაგეგმილ ვიზიტს.

"აგვისტოს ომის მეცხრე წლისთავზე მსგავსი ცინიკური ქმედება ემსახურება სამხედრო აგრესიის, ეთნიკური წმენდისა და ოკუპაციის გზით სუვერენული სახელმწიფოს საზღვრების ძალადობრივი ცვლილების დაკანონებას რუსეთის მხრიდან. ამ ნაბიჯით კრემლი ასევე უშედეგოდ ცდილობს თავისი საოკუპაციო რეჟიმების მხარდაჭერასა და ლეგიტიმაციას", - აღნიშნავენ საგარეო საქმეთა სამინისტროში.

უწყებაში მიიჩნევენ, რომ პუტინის ვიზიტით უხეშად ირღვევა საერთაშორისო სამართლის ფუნდამენტური ნორმები და პრინციპები. საგარეო საქმეთა სამინისტრო მოუწოდებს რუსეთის ფედერაციას, შეწყვიტოს პროვოკაციული ქმედებები საქართველოს სახელმწიფოებრიობის წინააღმდეგ და პატივი სცეს სუვერენული სახელმწიფოს ტერიტორიულ მთლიანობას.

საგარეო საქმეთა სამინისტრო მიმართავს საერთაშორისო თანამეგობრობას, სათანადოდ შეაფასონ მოსკოვის აგრესიული ნაბიჯები და ქმედითი ზომები მიიღონ, რათა რუსეთის ფედერაციამ შეასრულოს ნაკისრი საერთაშორისო ვალდებულებები.

აფხაზეთში აგვისტოს ომის მეცხრე წლისთავზე რუსეთის პრეზიდენტის ვიზიტის შესახებ ინფორმაცია 2 აგვისტოს გავრცელდა.