ანა ურუშაძის სრულმეტრაჟიანი მხატვრული ფილმის, საშიში დედის, მსოფლიო პრემიერა ლოკარნოს კინოფესტივალზე გაიმართა. რეჟისორის სადებიუტო ნამუშევარი ფესტივალის საკონკურსო პროგრამაში მოხვდა.

ფილმის პრემიერის შემდეგ, ტრადიციულად, მსოფლიო პრესა კინოსურათის შესახებ საინტერესო რეცენზიებითა და რევიუებით დაიხუნძლა, მათ შორის არის Cineuropa-ც.

ვასილის ეკონომუსის სტატია სახელად "საშიში დედა - ოჯახი როგორც მონსტრების ინკუბატორი", ვრცლად განიხილავს ანა ურუშაძის პირველ სრულმეტრაჟიან ფილმს და ძირითად აქცენტებს მთავარი როლის შემსრულებელ ნატა მურვანიძეზე და ოპერატორ კონსტანტინე-მინდია ესაძეზე აკეთებს. ავტორის აზრით, ამ ორი ადამიანის დამსახურებით ფილმი იდეალურად გადმოსცემს პოსტსაბჭოთა ქვეყნის დესპოტურ გარემოს.

"საშიში დედა, გაბედული დებიუტია, რომელიც განსხვავებული ფორმებითა გადმოცემული თუმცა არ კარგავს რეალობის შეგრძნებას, რომელიც საქართველოშია გამეფებული", წერს ვასილის ეკონომიუსი.

ურუშაძის ფილმი აკრძალვებსა და სტერეოტიპებზე, მორალურ ნორმებსა და სოციალურ პასუხისმგებლობაზე მოგვითხრობს. საშიში დედა 50 წლის ქალის - მანანას ცხოვრებას ასახავს. დედა და დიასახლისი დილემის წინაშე დგას, მას უწევს არჩევანი გააკეთოს ოჯახურ ცხოვრებასა და დიდი ხნის ვნებიან გატაცებას შორის. მანანა ცხოვრების აზრს წერაში პოულობს.