პრემიერი ირაკლი კობახიძე სალომე ზურაბიშვილს ნაცმოძრაობის პრეზიდენტს უწოდებს და ამბობს, რომ მასთან დებატებს "არავითარი ფასი არ გააჩნია".

"დებატებში არავითარ პრობლემას არ ვხედავ, პირიქით ისინი გაურბიან დებატებს. რაც შეეხება სალომე ზურაბიშვილს, მას კონსტიტუცია არ აძლევს უფლებას, რომ საერთოდ ჩართული იყოს საარჩევნო კამპანიაში. ის ამ შემთხვევაშიც არღვევს კონსტიტუციას, მათთან დებატებს არავითარი არც ფასი აქვს, არც სირთულე აქვს, რაღაც დებატები უნდა იყოს ცოტა რთული მაინც, იმისათვის, რომ იქ მონაწილეობა ღირდეს.

ჩვენი დღევანდელი მხარდაჭერა არის დაახლოებით 60 პროცენტი, ამ პირობებში ხედავთ, რომ სალომე ზურაბიშვილს არავითარი შანსი არ აქვს. მთელ ოპოზიციას, ვინც დღეს ლახავს ბარიერს, აქვს 20 პროცენტამდე. 60/20-ზე თავად შეგიძლიათ, იმსჯელოთ რა შანსები აქვს სალომე ზურაბიშვილს რომ არჩეული იყოს პრეზიდენტის თანამდებობაზე. ის "ნაცმოძრაობამ" დატოვა პრეზიდენტის პოსტზე, მას შემდეგ, რაც მან დაარღვია კონსტიტუცია, არის დღეს „ნაცმოძრაობის“ პრეზიდენტი, მეორედ "ნაცმოძრაობის" პრეზიდენტი ვერ გახდება", — აცხადებს ირაკლი კობახიძე.

ცნობისათვის, საქართველოს პრეზიდენტმა, სალომე ზურაბიშვილმა Figaro-სთან ინტერვიუში თქვა, რომ მეორე ვადით კენჭისყრას არ გამორიცხავს.

პრეზიდენტი აცხადებს, რომ თუ მის მიერ შეთავაზებული ქარტია ამოქმედდება, მზად არის იყოს მომლაპარაკებელი ევროპელ პარტნიორებთან.

"მზად ვარ ავიღო დიდი პასუხისმგებლობა, მათ შორის მეორე ვადით, რათა საქართველო დაუბრუნდეს ევროპულ გზას. თუ ჩემ მიერ შეთავაზებული ქარტია ამოქმედდება, მზად ვარ ვიყო მომლაპარაკებელი ჩვენს ევროპელ პარტნიორებთან", – ამბობს ზურაბიშვილი გამოცემასთან.