საპარლამენტო ოპოზიციის ძირითადი ნაწილი პარლამენტის პლენარულ სხდომებს ბოიკოტს უცხადებს.

ინტერპრესნიუსის ინფორმაციით, პოლიტიკური შეხედულებების გამო მიმდინარე კვირის სხდომებს არ დაესწრება ფრაქცია ნაციონალური მოძრაობა, პოლიტიკური ჯგუფები: ლელო, მოქალაქეები, რეფორმების ჯგუფი, ევროოპტიმისტები, თავისუფლება, ეროვნული და დემოკრატიული სახელმწიფოსთვის, ასევე პარლამენტის უფრაქციო წევრები: არმაზ ახვლედიანი, სალომე სამადაშვილი, თამარ კორძაია, გრიგოლ ვაშაძე თამარ ჩარკვიანი, დავით ბაქრაძე.

პარლამენტის პლენარული სხდომა დღეს 12 საათზე გაიხსნა. ამ წუთებში რეგისტრაცია გაიარა პარლამენტის 90 წევრმა. პარლამენტის თავმჯდომარემ, შალვა პაპუაშვილმა განაცხადა, რომ ქვორუმი არის და პარლამენტის საშემოდგომო სესია გახსნილად გამოაცხადა.

მიმდინარე სასესიო კვირაში, პლენარულ სხდომებზე, დეპუტატები ამნისტიის შესახებ და ოჯახური ღირებულებებისა და არასრულწლოვანთა დაცვის შესახებ კანონპროექტებს მუხლობრივად, მეორე მოსმენით განიხილავენ.