"იარაღის შესახებ“ კანონში ლიცენზიის ნებართვის შეჩერების წესი შემოდის, რაც დაკავშირებული იქნება იარაღის ტარების ნებართვის მფლობელის ფსიქიკურ, ასევე ალკოჰოლიზმით, ნარკომანიით ან ტოქსიკომანიით დაავადებასთან.

საკანონმდებლო პაკეტი პარლამენტში შინაგან საქმეთა სამინისტრომ წარადგინა.

კანონპროექტის მიხედვით, ნებართვის მფლობელის ჯანმრთელობის მდგომარეობის კანონმდებლობით განსაზღვრულ მოთხოვნებთან შეუსაბამობის შესახებ ინფორმაციის მიღებიდან 48 საათის ვადაში, შსს-ს მომსახურების სააგენტო ვალდებული იქნება ნებართვის შეჩერების თაობაზე შსს-ს შესაბამის ტერიტორიულ ორგანოს შეატყობინოს.

შეტყობინების მიღების შემდგომ შსს-ს ტერიტორიული ორგანოს უფლებამოსილი პირი იარაღის ნებართვის მფლობელის საცხოვრებელ ადგილზე/იარაღის შენახვის ადგილზე გამოცხადდება და ნებართვის მფლობელს ნებართვის შეჩერების თაობაზე შეატყობინებს. ნებართვის შეჩერების თაობაზე შეტყობინებასთან ერთად, უფლებამოსილი პირი იარაღის ჩამორთმევას მოახდენს.

ამასთან, კანონპროექტით, ნებართვის მფლობელს ლიცენზიის შეჩერების თაობაზე შეტყობინების მომენტიდან, 30-დღიანი ვადა განესაზღვრება, რათა შეჩერების საფუძვლის აღმოფხვრა და იარაღის კანონმდებლობით დადგენილი წესით განკარგვა უზრუნველყოს. თუ ლიცენზიის მფლობელი, ლიცენზიის შეჩერების თაობაზე შეტყობინების მომენტიდან 30 დღის ვადაში, შეჩერების საფუძველს არ აღმოფხვრის, მას ლიცენზია გაუუქმდება.