“სირცხვილია აუქმებს რუსულ კანონთან დაკავშირებით რეგისტრაციის გადაწყვეტილებას", — ამის შესახებ მათ მიერ ცოტა ხნის წინ გავრცელებულ განცხადებაშია ნათქვამი.

იქვე ვკითხულობთ, რომ სათანადოდ ვერ შევაფასეთ ის შედეგები, რაც მათ გადაწყვეტილებას შეიძლებოდა მოჰყოლოდა რუსული კანონის ფარგლებში შექმნილ რეესტრში დარეგისტრირებასთან დაკავშირებით.

განცხადების ავტორები იმასაც წერენ, რომ გიორგი მჟავანაძე ტოვებს დირექტორის თანამდებობას და მუშაობას ახალი ხელმძღვანელობით გააგრძელებენ.

"მოძრაობა სირცხვილია აუქმებს რუსულ კანონთან დაკავშირებით რეგისტრაციის გადაწყვეტილებას.

გვესმის და ვიღებთ საზოგადოების რეაქციას. ჩვენთვის მნიშვნელოვანია მოქალაქეებისა და თანამოაზრეების კრიტიკა. ძალიან ვწუხვართ, რომ სათანადოდ ვერ შევაფასეთ ის შედეგები, რაც ჩვენს გადაწყვეტილებას შეიძლებოდა მოჰყოლოდა. მიგვაჩნია, რომ ჩვენი განცხადების დროც, ფორმაცა და შინაარსიც იყო შეცდომა და შესაძლებელი იყო რისკების უკეთ გათვლა და პრევენცია.

ჩვენი გადაწყვეტილება ეფუძნებოდა მიზანს, რომ არჩევნებში მოქალაქეთა მონაწილეობის გასაზრდელად დაგეგმილი კამპანიები ჩაგვეტარებინა, რათა ოქტომბრის არჩევნებზე ხელისუფლების ცვლილებისთვის შეგვეწყო ხელი, თუმცა, გამოხმაურებებზე დაყრდნობით ვიაზრებთ, რომ თანამოაზრეებშიც კი ნიჰილიზმისა და იმედგაცრუების დათესვას შევუწყვეთ ხელი, რაც ცხადია, საერთო მიზანს როგორც მოკლე, ასევე გრძელვადიან პერსპექტივაში აზიანებს.

ჩვენი გადაწყვეტილების ერთ-ერთი საფუძველი იყო ის, რომ ფუნდამენტურად არასწორად მიგვაჩნდა ხელისუფლებისთვის წინასაარჩევნოდ ჯარიმების გადახდა, ახლაც იმავე აზრზე ვართ. ამიტომ, დაჯარიმების შემთხვევაში, "სირცხვილია" არ აპირებს ჯარიმების გადახდას.

გიორგი მჟავანაძე ტოვებს დირექტორის თანამდებობას და მუშაობას ახალი ხელმძღვანელობით ვაგრძელებთ.

მადლობა თანამოაზრეებს გულწრფელი კრიტიკისა და რჩევებისთვის", — ნათქვამია სირცხვილიას მიერ გავრცელებულ განცხადებაში.

შეგახსენებთ, რომ სირცხვილიამ გუშინ გაავრცელა Facebook-ში ვიდეო, სადაც ხსნიდნენ იმ მიზეზებს რატომ გადაწყვიტეს რუსული კანონის ფარგლებში შექმნილ რეესტრში დარეგისტრირება.