ბოლო ორ დღეში რუსული კანონის გამო ფუნქციონირება ორმა არასამთავრობო ორგანიზაციამ შეწყვიტა. მათგან ერთ-ერთი Animal Project-ია.

"კანონის გამო ვწყვეტთ ფუნქციონირებას. გვინდა ბოლო ფანდრაიზინგ-ივენთის გაკეთება, რომ ჩვენი შეფარებულ ცხოველები რამდენიმე თვე მაინც ვუზრუნველყოთ და კლინიკის ვალები დავფაროთ

ვის გინდათ ამ სიკეთე ივენთის მასპინძლობა და პარტნიორობა?

აქვე დავამატებ, ისედაც ნახევრად მოხალისეობრივად ვაკეთებდით და ვაკეთებდით სახელმწიფოს გასაკეთებელ საქმეს!", — აცხადებს ორგანიზაციის დამფუძნებელმა მარიამ ცერცვაძემ.

Animal project ცხოველებისთვის ცხოველების მოყვარული ადამიანების მიერ დაარსებული ორგანიზაციაა, რომლის მიზანია საქართველოში მიუსაფარი ცხოველების უკონტროლო გამრავლების, მათ მიმართ სასტიკი მოპყრობის, საზოგადოების ინფორმირება და ადვოკატირების გზით და სხვა პრობლემების მოგვარება.

კიდევ ერთი ორგანიზაცია, რომელიც რუსული კანონის გამო არსებობას წყვეტს ფონდი სიკეთის რევოლუციაა — განცხადება ფონდმა სოციალურ ქსელში გამოაქვეყნა.

"მოგეხსენებათ, რომ "კანონი გამჭვირვალობის შესახებ“ გულისხმობს ან უცხო ქვეყნის ინტერესების გამტარებლად რეგისტრაციას, ან ორგანიზაციის ლიკვიდაციას, თუ მისი დაფინანსების წყაროს 20 % უცხოეთიდან არის შემოსული. წინააღნდეგ შემთხვევაში ექვემდებარება ჯარიმას.

ფონდი ძირითადად ჩემი უახლოესი მეგობრების შემოწირულობით არსებობდა. ამათგან 3 მეგობარი ევროპიდან პერიოდულად მირიცხავდა თანხას ანგარიშზე. ფონდის შემოსავალი ყოველთვიურად შეადგენდა 1200-2000 ლარს, რაც თვეში 3-დან 5 ოჯახამდე დაფინანსების საშუალებას იძლეოდა", — ნათქვამია განცხადებაში.

ფონდი სიკეთის რევოლუცია ემსახურება ოჯახების დახმარებას საკვებით, ტანსაცმლითა და სხვა საყოფაცხოვრებლო ნივთებით. ფონდი 3 წლის განმავლობაში მთელი საქართველოს მასშტაბით 400-მდე ოჯახს დაეხმარა.

"ძალიან მწყდება გული… ის, რაც მე და ჩემმა მოსწავლეებმა ერთობლივად გავაკეთეთ, რაც ძალიან გვიყვარდა და გვაბედნიერებდა, ახლა უნდა დავასრულოთ.

ვინმემ არ მითხრას, რომ ამ კანონმა ფიზიკური პირები არ დააზარალა, წინააღმდეგ შემთხვევაში თქვენთან გადმოვამისამართებ ფონდის ყველა ბენეფიციარს და თქვენ დაეხმარეთ. უკვე ფონდის არცერთი ანგარიში არ მუშაობს.

P.s ფონდის ლიკვიდაციისთვის 208 ლარი გადავიხადე, არადა ამ თანხით ერთ ოჯახს დავეხმარებოდით", — ნათქვამია განცხადებაში.