2008 წლის 26 აგვიტოს, რუსეთის ფედერაციის მაშინდელმა პრეზიდენტმა, დიმიტრი მედვედევმა ოკუპირებული აფხაზეთი და სამხრეთ ოსეთი დამოუკიდებელ სახელმწიფოებად აღიარა. ეს დღე წლებია სახალხო ზეიმით აღინიშნება საქართველოს ოკუპირებულ ტერიტორიებზე.

ე.წ. სამხრეთ ოსეთის დე ფაქტო რესპუბლიკის პრეზიდენტმა ალან გაგლოევმა თავის გამოსვლაში თქვა, რომ აფხაზებთან ერთად რთულად, მაგრამ ღირსეულად გაიარეს ეს გზა და "დამსახურებულ აღიარებასაც" მიაღწიეს.

“სამხრეთ ოსეთისა და აფხაზეთის მოსახლეობამ ერთად გაიარეს ერთი და იგივე რთული გზა, ამავდროულად, იბრძოდნენ ერთი და იგივე მტრის წინააღმდეგ. ყველაზე რთულ დროს ისინი ძმებივით იდგნენ ერთმანეთთან. დღეს აფხაზეთში იმყოფება სამხრეთ ოსეთის დელეგაცია, რომლებიც ჩვენს ძმებთან ერთად მონაწილეობას იღებენ სადღესასწაულო ღონისძიებებში, რომელიც იქ იმართება”, – აღნიშნა გაგლოევმა.

"აღიარების დღესთან" დაკავშირებით წერილი გაავრცელა ე.წ. აფხაზეთის დე ფაქტო საგარეო სამინისტრომაც. დე ფაქტო სამინისტრო ოკუპირებულ სამხრეთ ოსეთს "ისტორიული სამართლიანობის აღდგენას" ულოცავს.

“რუსეთის ფედერაციის ეს ნაბიჯი ჩვენი მოსახლეობებისთვის საბედისწერო აღმოჩნდა, აღადგინა ისტორიული სამართლიანობა და გარანტირებული უსაფრთხოება. ჩვენ დარწმუნებული ვართ, რომ აფხაზეთისა და სამხრეთ ოსეთის ურთიერთობები, რომელთა მყარი საფუძველი ძმობისა და მეგობრობის კავშირებია, ნაყოფიერად განვითარდება ჩვენი ხალხების საკეთილდღეოდ,” – წერია მილოცვაში.

შეგახენებთ, საერთაშორისო თანამეგობრობა არ აღიარებს საქართველოს ოკუპირებულ ტერიტორიებს დამოუკიდებელ რესპუბლიკებად. შეერთებული შტატები და ევროკავშირი მკაცრად გმობენ რუსეთის მიერ განხორციელებულ სამხედრო აგრესიას და რუსეთის ფედერაციის პრეზიდენტს ჯარების საქართველოს ტერიტორიიდან გაყვანისკენ მუდმივად მოუწოდებენ.

საქართველოს ოკუპირებულ ტერიტორიებს ცალკე რესპუბლიკებად რუსეთის გარდა აღიარებს: ნიკარაგუა, ვენესუელა, ნაურუ და სირია.