ბულგარეთის პრეზიდენტმა, რუმენ რადევმა, ევროპის საბჭოსა და სამოქალაქო საზოგადოების აქტივისტების მოწოდებების მიუხედავად, ახალ ანტი-ლგბტ კანონს ვეტო არ დაადო. ინფორმაციას Euractiv ავრცელებს. გამოცემა წერს, რომ ახალი კანონი ბულგარეთის სკოლებში “არატრადიციული სექსუალური ორიენტაციის“ შესახებ ნებისმიერი სახის საგანმანათლებლო პროგრამას კრძალავს.

ცვლილებები ინიციირებული იყო რადიკალური პრორუსული პარტია “აღორძინების“ მიერ და დაჩქარებულ ვადებში, ინიციირებიდან ორ დღეში მიიღეს.

საკანონმდებლო ცვლილებების თანახმად, სკოლებში ნებისმიერი საგანმანათლებლო პროგრამა იკრძალება, რომელიც დაკავშირებულია “არატრადიციულ სექსუალურ ორიენტაციასთან“ და ის ჩაითვლება, როგორც პროპაგანდა.

ბულგარეთის პრეზიდენტის გადაწყვეტილებას ევროპის საბჭოს ადამიანის უფლებათა კომისარი მაიკლ ო’ფლაერტი X-ზე გამოეხმაურა, სადაც ის პრეზიდენტ რადევს მოუწოდებს, რომ ხელი არ მოაწეროს საკანონმდებლო ცვლილებას.

“ძალიან შეშფოთებული ვარ ბულგარეთის პარლამენტის მიერ მიღებული კანონით, რომელიც კრძალავს ე.წ. ლგბტი „პროპაგანდას“ სკოლებში. მოვუწოდებ პრეზიდენტ რადევს, ხელი არ მოაწეროს საკანონმდებლო ცვლილებას. ხელისუფლებამ უნდა მოაგვაროს დისკრიმინაცია და მტრული რიტორიკა ლგბტი ადამიანების მიმართ, მათ შორის, წინასაარჩევნოდ“, — წერს ევროპის საბჭოს ადამიანის უფლებათა კომისარი მაიკლ ო’ფლაერტი X-ზე.

შეგახსენებთ, რომ რუსეთი პირველი ქვეყანა იყო, რომელმაც 11 წლის წინ მიიღო კანონი, რომელიც კრძალავს არასრულწლოვანთა მიმართ “ჰომოსექსუალურ პროპაგანდას“. უკრაინის ომის შემდეგ, რუსეთის კანონმდებლობამ “არატრადიციული სექსუალური ურთიერთობები“ საერთოდ აკრძალა, რამაც მკვეთრად შეზღუდა გეი და ლგბტი ადამიანების უფლებებს რუსეთში.