საქართველოს პარლამენტის წევრი ევროპული საქართველოდან, ზურაბ ჭიაბერაშვილი ამბობს, რომ ამერიკის შეერთებული შტატები საქართველოს დამოუკიდებლობის, სუვერენიტეტისა და ტერიტორიული მთლიანობის მტკიცე მხარდამჭერი და გარანტია. მანვე აშშ-ს ვიცე-პრეზიდენტის ვიზიტი საქართველოში ამის მკაფიო ხაზგასმად შეაფასა.

"იმედი გვაქვს, რომ ამის შემდეგ მაინც საქართველოს მთავრობა მიმართავს ძალისხმევას, რა თქმა უნდა, ამერიკის შეერთებული შტატების მტკიცე მხარდაჭერით, რომ საერთაშორისო დღის წესრიგში ისევ მოხვდეს საქართველოს ძირეული პრობლემის - ოკუპირებული ტერიტორიების საკითხის აქტუალიზაცია, რაც აუცილებელია იმისთვის, რომ აღდგეს ჩვენი ტერიტორიული მთლიანობა", - აღნიშნა ჭიაბერაშვილმა

მისივე თქმით, აშშ-სთან ურთიერთობაში ყველა პოტენციალის გამოყენება მნიშვნელოვანია. ჭიაბერაშვილი აღნიშნავს, რომ თავისუფალი ვაჭრობის შეთანხმებაზე მუშაობა უნდა დაიწყოს, რაც მოქალაქეების კეთილდღეობაზე აისახება.

31 ივლისსა და პირველ აგვისტოს, საქართველოს ამერიკის შეერთებული შტატების ვიცე-პრეზიდენტი მაიკ პენსი, მეუღლესთან ერთად ეწვევა. ის თბილისში პრემიერ-მინისტრ გიორგი კვირიკაშვილის მოწვევით ჩამოდის.