იუსტიციის მინისტრი, თეა წულუკიანი ამბობს, რომ მიხეილ სააკაშვილის უკრაინის ტერიტორიაზე დაბრუნებისას, მათ მისი საქართველოსთვის გადმოცემა და ორი წლის წინ გაგზავნილილი ექსტრადირების მოთხოვნის შესრულება შეუძლიათ. ამის შესახებ მან გადაცემა იმედის დროში ისაუბრა:

"ჩვენი მოთხოვნა მის გადმოცემაზე, იქნება თუ არა ის საქართველოს მოქალაქე, ძალაშია უკრაინულ მხარესთან და საბუთები უდევთ მაგიდაზე. მათ თუ სურთ მისი გადმოცემა, შეუძლიათ ხვალვე მიიღონ ეს გადაწყვეტილება".

მინისტრი აღნიშნავს, რომ მიხეილ სააკაშვილი პოლიტიკურად საინტერესო ფიგურა აღარ არის და ეს პროცესი "წმინდად საგამოძიებო და საპროკუროროა":

"საქართველოს მხარემ ჯერ კიდევ საქართველოს მოქალაქე მიხეილ სააკაშვილი მოითხოვა გადმოსაცემად, ოთხ სხვადასხვა სისხლის სამართლის საქმეზე, მათ შორის დეპუტატ გელაშვილის ცემა, ცხრა მილიონი, სახელმწიფო ხარჯების გაფლანგვა და 7 ნოემბრის საქმე. ამ საქმეებზე ჩვენ მოვითხოვეთ 2014-15 წლებში მისი ექსტრადიცია. უკრაინულმა მხარემ 2015 წლის აპრილში თქვა, რომ ვერ გადმოგვცემდა მიხეილ სააკაშვილს, ვინაიდან არა წმინდა სამართლებრივი არამედ, დისკრიმინაციული ნიშნები დაინახა. როგორც ჩანს, მათ ეს პოზიცია შეცვალეს".

მიხეილ სააკაშვილს უკრაინის მოქალაქეობა რამდენიმე დღის წინ ჩამოართვეს. უკრაინის ხელისუფლების ინფორმაციით, სააკაშვილისთვის მოქალაქეობის ჩამორთმევის საფუძველი გახდა შესაბამისი კანონის ერთ-ერთი მუხლი, რაც მოქალაქეობის მიღებას ტყუილის გამოყენებით გულისხმობს. კერძოდ, სააკაშვილმა ანკეტაში მიუთითა, რომ მის მიმართ არ მიმდინარეობდა სისხლის სამართლებრივი დევნა რომელიმე სახელმწიფოში, თუმცა საქართველოში მის წინააღმდეგ არაერთ საქმეზეა გამოძიება დაწყებული. მიხეილ სააკაშვილის თქმით, ის არ აპირებს არცერთი სხვა ქვეყნის მოქალაქეობის მიღებას, ან თავშესაფრის მოთხოვნას.