აშშ-ის ელჩის, იან კელის თქმით, ვიცე-პრეზიდენტ მაიკ პენსს ჩამოსვლისას ძლიერი გზავნილი ექნება, რომ შტატები მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას. ელჩმა ამის შესახებ, დღეს, 30 ივლისს, ღირსეული პარტნიორი 2017-ის გახსნის ცერემონიალზე ისაუბრა:

"შეერთებულ შტატებში პრემიერ-მინისტრის ვიზიტის გაგრძელებასთან ერთად, ჩემი აზრით, ვიცე-პრეზიდენტს სურს გამოხატოს სოლიდარობა საქართველოს მიმართ, რომელიც ცდილობს ააშენოს მოქნილი სახელმწიფო, გააძლიეროს თავისი შეიარაღებული ძალები და თავდაცვისუნარიანობა".

აშშ-ის ვიცე-პრეზიდენტი, მაიკ პენსი საქართველოს, ესტონეთსა და მონტენეგროს ოფიციალური ვიზიტით ეწვევა. მისი ვიზიტი საქართველოში, 31 ივლისსა და პირველ აგვისტოს შედგება.

საქართველოში, პენსი, სხვა ოფიციალურ პირებთან ერთად, პრეზიდენტ მარგველაშვილსა და პრემიერ-მინისტრ გიორგი კვირიკაშვილს შეხვდება. ისინი ასევე მოინახულებენ საქართველოში ნატოს საწვრთნელ ცენტრს.