აზერბაიჯანში ვადამდელი საპარლამენტო არჩევნები 1 სექტემბერს გაიმართება, საკონსტიტუციო სასამართლომ პარლამენტის დათხოვნა დაამტკიცა.

დეპუტატებმა საკონსტიტუციო სასამართლოს გასული კვირის დასაწყისში მიმართეს, პარლამენტის დათხოვნის კანონიერების დასამტკიცებლად. პარასკევს კი სასამართლომ გადაწყვეტილება დაამტკიცა.

პრეზიდენტმა ილჰამ ალიევმა თქვა, რომ ამ ნაბიჯის მიზანია, არ გადაიფაროს არჩევნებით COP29 კლიმატის კონფერენცია, რომელიც უნდა ჩატარდეს ბაქოში 2024 წლის 11-22 ნოემბერს. საპარლამენტო არჩევნები 2025 წელს უნდა ჩატარებულიყო.

აზერბაიჯანში საპარლამენტო არჩევნები ბოლოს 2020 წელს ჩატარდა, ალიევის პარტიამ 120 ადგილიდან 70 მოიპოვა, გაყალბების შესახებ გავრცელებული ცნობების ფონზე. დარჩენილი ადგილები გადაეცათ პროსახელისუფლებო დამოუკიდებელ კანდიდატებსა და მცირე ოპოზიციურ პარტიებს.

ჯამილ ჰასანლიმ, რომელიც ხელმძღვანელობს ოპოზიციურ ბლოკს, დემოკრატიული ძალების ეროვნულ საბჭოს, ეჭვქვეშ დააყენა ამ ნაბიჯის კანონიერება.

ჰასანლიმ OC Media-ს განუცხადა, რომ აზერბაიჯანის კონსტიტუციის თანახმად, პარლამენტს მხოლოდ ძალიან კონკრეტულ გარემოებებში ჰქონდა დაშლის უფლება.

"პარლამენტის დათხოვნის მოთხოვნის უფლება მხოლოდ პრეზიდენტს აქვს, საკონსტიტუციო სასამართლომ უნდა გადაწყვიტოს, დაირღვა თუ არა საკონსტიტუციო კანონი, მათ ევალებათ კონსტიტუციის დაცვა.

COP29 არ არის პარლამენტის დათხოვნის საფუძვლიანი მიზეზი, ეს არის პოლიტიკური გადაწყვეტილება“, — განაცხადა მან.

ჯერჯერობით უცნობია, რომელი ოპოზიციური პარტიები იყრიან კენჭს. წინა არჩევნებში, უმსხვილესი ოპოზიციური პარტიების რამდენიმე კანდიდატს, მათ შორის სახალხო ფრონტის პარტიას და მუსავატს, კენჭისყრა აეკრძალათ.

მუსავატის სპიკერმა მუსტაფა ჰაჯიბაილიმ განუცხადა OC Media-ს, რომ მათ ჯერ არ გადაუწყვეტიათ, მიიღებენ თუ არა მონაწილეობას არჩევნებში.

"მუსავატი, როგორც პარტია, დაინტერესებულია არჩევნებში მონაწილეობით, მაგრამ ჯერ არ გადაგვწყვეტია. ასეთი საკითხები გადასაწყვეტად ყოველთვის მიგვაქვს კოლეგებთან კონფერენციაზე", — თქვა მან.

არჩევნების ზუსტი თარიღის დანიშვნამდე საუბრისას ჰაჯიბაილიმ განაცხადა, რომ ორი თვე არ იქნება საკმარისი არჩევნებისთვის მოსამზადებლად.

მისი თქმით, ვადამდელი არჩევნების დანიშვნის მიზეზია, ოპოზიციურ პარტიებსა და უცხოელ დამკვირვებლებს არ მიეცეთ მომზადების საშუალება.

"რადგან ხელისუფლებაში მყოფები მუდმივად ვადამდელ არჩევნებს გეგმავენ, როგორც ჩანს, ისინი ამას შეგნებულად აკეთებენ”, — თქვა მან.

ჰაჯიბაილიმ დასძინა, რომ არ სჯერა, რომ აზერბაიჯანის ხელისუფლება დემოკრატიული არჩევნების ჩატარებას აპირებს.

ადმინისტრაციული რესურსები

ჰაჯიბაილიმ OC Media-ს განუცხადა, რომ დაფინანსება ოპოზიციური პარტიების მთავარი პრობლემაა.

"როდესაც ოპოზიციური პარტიების წევრები პარლამენტში იყვნენ, არ აძლევდნენ პარტიებს ბიუჯეტიდან დაფინანსებას. მაგრამ პარლამენტში ოპოზიციური პარტიების წმენდის შემდეგ [2010-იანი წლების დასაწყისში], მათ მიიღეს პარტიების დაფინანსების გადაწყვეტილება და ცვლილებები შეიტანეს პარტიების დაფინანსების შესახებ კანონში”, — თქვა მან.

მუსავატის სპიკერმა თქვა, რომ მათი პარტია ფუნქციონირებს შემოწირულებებისა და საწევრო გადასახადების საშუალებით, რაც, მისი თქმით, საკმარისია მხოლოდ კომუნალური გადასახადების დასაფარად.

ჰაჯიბაილიმ აღნიშნა, რომ 2020 წლის საპარლამენტო არჩევნებზე, მუსავატმა 88 კანდიდატი წარადგინა, თუმცა ცენტრალურმა საარჩევნო კომისიამ მათგან მხოლოდ 60 დაამტკიცა:

"და ეს გადაწყვეტილებები შეეხო ჩვენს უფლებას, მივიღოთ უფასო საეთერო დრო, რადგან კანონის თანახმად, უფასო საეთერო დროის მისაღებად 61 კანდიდატის დოკუმენტი უნდა იყოს დადასტურებული“.

დემოკრატიული ძალების ეროვნული საბჭოს წარმომადგენელმა, ჯამილ ჰასანლიმ თქვა, რომ მთავრობამ უკვე "გაწმინდა საზოგადოება“ არჩევნებისთვის მოსამზადებლად.

"აზერბაიჯანის მთავრობამ გაახანგრძლივა კარანტინი, დაიხურა სახმელეთო საზღვრები, აიკრძალა შეკრების თავისუფლება, დააკავეს ჟურნალისტები, დაიჭირეს 300-ზე მეტი პოლიტპატიმარი“, — განაცხადა მან.

"ამ არჩევნებისთვის მზადების ნაწილი იყო AbzasMedia-ს, Toplum TV-სა და Kanal13-ის უფლებების დარღვევა. ხელისუფლება ამ არჩევნებისთვის საბჭოთა პერიოდის მსგავსად, "წმენდით“ მოემზადა“, — განაცხადა მან.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.