საქართველოს პრემიერ-მინისტრის, გიორგი კვირიკაშვილის ისრაელში ვიზიტისას დაიგეგმა ორმხრივი ეკონომიკური თანამშრომლობის მთავრობათაშორისი კომისიის სხდომა, რომელიც სექტემბერში, საქართველოში ჩატარდება. ამავე სხდომის ფარგლებში თბილისს ეწვევა ისრაელის პრემიერი, ბენიამინ ნეთანიაჰუ. ამის შესახებ გიორგი კვირიკაშვილმა მთავრობის სხდომის დაწყებამდე განაცხადა:

"მოგეხსენებათ, დღევანდელ მსოფლიოში ბატონი ნეთანიაჰუ გახლავთ ერთ-ერთი ნამდვილად გამორჩეული პოლიტიკური ლიდერი და მისი ჩამოსვლა ბიზნეს დელეგაციასთან ერთად, ვფიქრობთ, იქნება ძალიან მნიშვნელოვანი სტიმული ორმხრივი ეკონომიკური ურთიერთობების განვითარების კუთხით. დაპატიჟება იქნა მიღებული და ჩვენ უნდა ველოდოთ ამ ვიზიტს, რომელიც, ვფიქრობთ, სრულიად ახალ ბიძგს მისცემს ჩვენს ორმხრივ ურთიერთობებს", - თქვა პრემიერმა.

გიორგი კვირიკაშვილის თქმით, ისრაელში ვიზიტისას შედგა შეხვედრები ბენიამინ ნეთანიაჰუსთან, პრეზიდენტ რუვენ რივლინსა და ქნესეთის თავმჯდომარე იული ედელშტეინთან, ასევე, იერუსალიმისა და პალესტინის პატრიარქ თეოფილოს III-თან.