საქართველოს მესამე პრეზიდენტისა და უკრაინის ოდესის ოლქის ყოფილი გუბერნატორის, მიხეილ სააკაშვილის თანამებრძოლი, დავით საყვარელიძე ადასტურებს, რომ სააკაშვილს უკრაინის მოქალაქეობა ჩამოერთვა. პოსტი ამის შესახებ, საყვარელიძემ ფეისბუკზე გამოაქვეყნა:

"ვფიქრობ, ვრცელი კომენტარი ზედმეტია. ცხადია, რომ უკრაინამ მიიღო მორიგი "იანუკოვიჩი" - ოღონდ ინგლისურად მოსაუბრე.

დიდი ხანია ყველასთვის ცხადია, რომ ასე გაგრძელება შეუძლებელია - უკრაინა აღმოჩნდა გადარჩენისა და სახელმწიფოებრიობის შენარჩუნების ზღვარზე. ადამიანი, რომელიც ამის შესახებ ყველაზე ხმამაღლა საუბრობდა, დღეს აღმოჩნდა უკრაინის მოქალაქეობისა და ქვეყანაში შესვლის უფლების გარეშე. თუმცა, ეს ვერანაირი ფორმით ვერ შეგვაჩერებს ჩვენ - მიხეილ სააკაშვილის ახალი ძალის მოძრაობას. პირიქით, მე დარწმუნებული ვარ, რომ ეს მოაახლოებს პეტრო პოროშენკოს რეჟიმის დასასრულს".

დავით საყვარელიძის თქმით, მიხეილ სააკაშვილის უკრაინული პარტია გააგრძელებს კოორდინირებულ ქმედებებსა და ბრძოლას ცვლილებებისთვის.

ინფორმაცია მიხეილ სააკაშვილისთვის უკრაინის მოქალაქეობის ჩამორთმევის შესახებ, უკრაინულმა მედიამ დღეს გაავრცელა. თავად სააკაშვილი ამ ფაქტს ჯერ არ გამოხმაურებია. ის ამერიკის შეერთებულ შტატებში იმყოფება.