რა ხდება: პარლამენტი ბოლო, მესამე მოსმენით განიხილავს რუსულ კანონს, სხდომა ხმაურით მიმდინარეობს.

  • სტრატეგია აღმაშენებლის ლიდერმა, გიორგი ვაშაძემ, კიდევ ერთხელ მოუწოდა საპარლამენტო უმრავლესობას, გადახედონ საკუთარ გადაწყვეტილებას.
  • "რა არის ის ფასი, რაც გაიძულებთ, ეს გააკეთოთ", — ჰკითხა მან ქართული ოცნების დეპუტატებს.

დეტალები: "სანქციები იქნება, მაგრამ ყველაზე დიდი სანქცია ქართველი ხალხის სანქციაა. შავ ლაქად შევა თქვენი სახელები და გვარები საქართველოს ისტორიაში", — უთხრა მან უმრავლესობას.

მისივე თქმით, ოცნების დეპუტატები უსმენენ არა ხალხს, არამედ მხოლოდ ბიძინა ივანიშვილს:

  • "ის კი არც გისმენთ, დარწმუნებული ვარ, თქვენთან კონტაქტიც არ აქვს. დღეს არის გადარჩენის, ან დაღუპვის გზა. ვინც ხელს აწერს დაღუპვის გზას, ის ვერასოდეს იქნება საქართველოში დაფასებული", — თქვა ვაშაძემ.

მესამე, საბოლოო მოსმენა ითვალისწინებს კანონპროექტის ტექნიკურ-რედაქციული შინაარსის განხილვას. ამ პროცესის შემდეგ პარლამენტის მესამე მოსმენით მხარდაჭერა კანონპროექტის მიღებას ნიშნავს და ის შემდეგ ხელმოსაწერად საქართველოს პრეზიდენტს გაეგზავნება. ცნობილია, რომ პრეზიდენტი რუსულ კანონს დაადებს ვეტოს, თუმცა, საპარლამენტო უმრავლესობას შეუძლია მისი დაძლევა.