საქართველოს პარლამენტის დეპუტატი ევროპული საქართველოდან, ოთარ კახიძე, რუსული ფაშიზმის წინააღმდეგ აქციაზე იარაღით მისვლის გამო, პოლიციაში გამოკითხვაზეა დაბარებული. ძველი სამმართველოს პოლიციის განყოფილებაში ის 15 საათზეა დაბარებული. ამის შესახებ ინფორმაცია On.ge-ს შინაგან საქმეთა სამინისტროში მიაწოდეს.

უწყების პრესსამსახურის ინფორმაციით, აღნიშნულ საქმეზე სამართალწარმოება "ადმინისტრაციულ სამართალდარღვევათა კოდექსის" 174-ე პრიმა მუხლისა (შეკრების ან მანიფესტაციის ორგანიზებისა და ჩატარების წესის დარღვევა) და 239-ე მუხლის მე-13 ნაწილის (სამართალდარღვევათა ოქმს ადგენს შსს) საფუძველზე დაიწყო. მათივე ინფორმაციით, გამოკითხვის შემდეგ, ადმინისტრაციულ სამართალდარღვევათა ოქმი სასამართლოს გადაეგზავნება, რომელიც საკითხზე საბოლოო გადაწყვეტილებას მიიღებს.

23 ივლისს გამართული აქციის დროს ოთარ კახიძის მიერ იარაღის ტარების შემთხვევა პალიტრანიუსის ჟურნალისტებმა გადაიღეს. საქართველოს ახალგაზრდა იურისტთა ასოციაციის იურისტი, გიორგი გოცირიძე ამბობს, რომ საქართველოს კანონმდებლობით აკრძალულია მანიფესტაციის დროს ცეცხლსასროლი იარაღის ტარება. თუმცა განმარტავს:

"როდესაც არამასობრივად ატარებენ იარაღს და ის არ არის აქციის დაშლის მიზეზი, მსგავსი დარღვევა აქცია უკანონოდ ვერ აქცევდა და არ არის პასუხისმგებლობის საფუძველი. დარღვევა უნდა აღმოეჩინა ადგილობრივი თვითმმართველობის უფლებამოსილ პირს და გაფრთხილება მიეცა აქციის ორგანიზატორისთვის დარღვევის აღმოსაფხვრელად".