მოკლედ: პარლამენტში პლენარული სხდომა ხმაურისა და დაპირისპირების ფონზე მიმდინარეობს.

  • ოპოზიცია გუშინ, მშვიდობიანი აქციის დარბევის გამო ხელისუფლებისგან პასუხს ითხოვს. სხდომათა დარბაზში დღეს მძიმედ ნაცემი ლევან ხაბეიშვილიც მივიდა — მას აქციის მიმდინარეობისას სპეცრაზმი ფიზიკურად გაუსწორდა.

დეტალები: პარლამენტის თავმჯდომარე, შალვა პაპუაშვილი მიკროფონს უთიშავს ყველას, ვინც გუშინ მომხდარის შეფასებას ცდილობს.

  • მიზეზად მოჰყავს რეგლამენტი და ამბობს, რომ დღეს მხოლოდ რუსული კანონის მეორე მოსმენასთან დაკავშირებული კითხვები უნდა დასვან.

ოპოზიციონერმა დეპუტატმა სალომე სამადაშვილმა ფეისბუქვიდეოში თქვა, რომ უმრავლესობის წარმომადგენლები მათი მისამართით ისვრიან ბოთლებს და აყენებენ შეურაცხყოფას.

  • კადრებში ჩანს ფიზიკური დაპირისპირება და ისმის გინებაც.

სხდომათა დარბაზში მომხდარი დაპირისპირების შესახებ ისაუბრა თეონა აქუბარდიამაც.

  • მისი თქმით, დიმიტრი ხუნდაძემ ოპოზიციის მხარეს წიგნი ისროლა.
  • „ფიზიკური ცემა-ტყეპაა ქალებთან. ქალებსაც ესვრიან ბოთლებს ქართული ოცნების დეპუტატები. მივიდა პაპუაშვილი იმიტომ, რომ ხაბეიშვილისთვის ეთქვა, რომ წუხს და თიკამ უთხრა, რომ გასულიყო, რომ მათი წუხილი არავის სჭირდებოდა. დაიწყო შემდეგ ჩხუბი. მივიდნენ კაცები. ახლაც მიდის, ქალებს ესვრიან ბოთლებს. მიდის ფიზიკური ჭიდაობა", — თქვა აქუბარდიამ.

ამ დროისთვის პლენარულ სხდომაზე რუსული კანონის განხილვა გრძელდება.