ჰანიველ პარტნერსის მმართველი პარტნიორის, ირაკლი რუხაძის ლიბერთი ბანკის სამეთვალყურეო საბჭოს წევრობა და ამავე საბჭოდან თავმჯდომარის, ვლადიმერ გურგენიძის თანამდებობიდან გადაყენება იგეგმება. ეს ის საკითხებია, რასაც ბანკის აქციების მფლობელები რიგგარეშე საერთო კრებაზე 2017 წლის 14 აგვისტოს განიხილავენ.

ამავე კრებაზე დაგეგმილია, რომ რუხაძის მსგავსად სამეთვალყურეო საბჭოს წევრებად დაინიშნონ გიორგი კალანდარიშვილი და დავით შონია. კანდიდატების ცვლილების დამტკიცებაზე ბანკი აქციონერებს მიმართავს და დასძენენ, რომ გადაწყვეტილება იმ შემთხვევაში მიიღონ, თუ ეროვნული ბანკი წინააღმდეგი არ იქნება.

ამავე დღის წესრიგით, რეკომენდაციის სახით, ბანკი აქციონერებს მიმართავს ვლადიმერ გურგენიძეს აუნაზღაუროს, ხელშეკრულებაში გათვალისწინებული წესით, ხელფასის სამმაგი ოდენობა და ე.წ. ხელმოწერის თანხა, რომლის შესახებაც ხელშეკრულებაშია განსაზღვრული.

ირაკლი რუხაძე 2016 წლის სექტემბერში ბიზნესკონტაქტთან საუბრისას აღნიშნავდა, რომ ის და მისი პარტნიორები ლიბერთი ბანკის საკონტროლო პაკეტის შესყიდვას გეგმავდნენ და ამისთვის თვენახევარი სჭირდებოდათ.

ირაკლი რუხაძე ტელეკომპანია იმედის სამეთვალყურეო საბჭოს თავმჯდომარეა და გარდაცვლილი ბადრი პატარკაციშვილის ოჯახის მრჩეველია. ვლადიმერ გურგენიძე კი, ეროვნული ბანკის 2017 წლის პირველი კვარტლის მონაცემებით, ბანკის აქციების თითქმის ხუთპროცენტიან წილს ფლობს.