პარლამენტის დეპუტატი ევროპული საქართველოდან, ოთარ კახიძე ეხმაურება პალიტრა ნიუსის მიერ გავრცელებულ კადრებს, სადაც ჩანს, რომ ის აქციაზე იარაღით იყო. კახიძე ამბობს, რომ მას იარაღის ტარების უფლება აქვს.

"მინდა განვმარტო, რომ ლეგალურად ვფლობ გლოკ 19-ს და მაქვს ცეცხლსასროლი იარაღის ტარების უფლება, როგორც პარლამენტის წევრს. იარაღის მჭიდში თავსდება 15 ერთეული 9მმ ვაზნა. ზოგჯერ თან დამაქვს სათადარიგო მჭიდიც. ვისვრი საკმაოდ ზუსტად, მიჯრით სროლისას სამიდან ერთი ათიანშია. იარაღს ვატარებ აუცილებელი მოგერიების ფარგლებში თავდაცვის მიზნით. ჩემი შეცდომაა, უნდა დამეტოვებინა იარაღი, განვმარტავ, რომ ეს არ იყო უკანონო იარაღი.", - წერს ფეისბუკზე ოთარ კახიძე.

ფოტო: ფოტო ვიდეოდან / პალიტრანიუსი

საქართველოს ახალგაზრდა იურისტთა ასოციაციის იურისტი, გიორგი გოცირიძე ამბობს, რომ საქართველოს კანონმდებლობით აკრძალულია მანიფესტაციის დროს ცეცხლსასროლი იარაღის ტარება. თუმცა განმარტავს:

"როდესაც არამასობრივად ატარებენ იარაღს და ის არ არის აქციის დაშლის მიზეზი, მსგავსი დარღვევა აქცია უკანონოდ ვერ აქცევდა და არ არის პასუხისმგებლობის საფუძველი. დარღვევა უნდა აღმოეჩინა ადგილობრივი თვითმმართველობის უფლებამოსილ პირს და გაფრთხილება მიეცა აქციის ორგანიზატორისთვის დარღვევის აღმოსაფხვრელად".

გუშინ, 23 ივლისს, აღმაშენებლის გამზირზე პარტია ევროპულმა საქართველომ მსვლელობა რუსული ფაშიზმის წინააღმდეგ მოაწყეს.