პარტია თავისუფალი საქართველო 26 მაისს, ე.წ. ყინწვისის საქმეზე მსჯავრდებული პირების გამართლებას მოითხოვს. მათივე ცნობით, დავით შუკაკიძე 2011 წლის მაისში ე.წ ყინწვისის საქმეზე მეგობრებთან ერთად დააკავეს და ქარელის პოლიციაში აწამეს. შუკაკიძე 2013 წლის იანვარში, პოლიტიკური ამნისტიით გათავისუფლდა.

როგორც პარტია აცხადებს, 2017 წლის ივლისში დავით შუკაკიძემ თავად მიმართა თბილისის სააპელაციო სასამართლოს საქმის გადახედვის მოთხოვნით:

"შეპირებული ე.წ სამართლიანობის აღდგენის პროცესი მთავარ პროკურატურას სამწუხაროდ დღემდე არ წამოუწყია".

სასამართლოში შუკაკიძის ინტერესებს იცავენ კახა კუკავა, ბექა პაპიძე და გვანცა მოდებაძე.

2011 წლის 26 მაისს, ყინწვისის სამონასტრო კომპლექსის მიმდებარე ტერიტორიაზე შსს-ს თანამშრომლებმა 24-კაციანი დაჯგუფება დააკავეს, საქართველოს კონსტიტუციური წყობილების შეცვლის მცდელობის ბრალდებით. შსს-ს ოფიციალური ინფორმაციით, 24 ადამიანისგან შემდგარ დაჯგუფებას საქართველოს ყოფილი შს მინისტრი და ასევე მხედრიონის ერთ-ერთი ლიდერი, თემურ ხაჩიშვილი ხელმძღვანელობდა.