თბილისის სააპელაციო სასამართლო ტელეკომპანია რუსთვი2-ის მიერ გავრცელებულ ინფორმაციას ეხმაურება, რომლის მეხედვითაც, სააპელაციო სასამართლოში ტელეარხის საქმის განმხილველი მოსამართლე შორენა ყაველაშვილი, არ იყო უფლებამოსილი, განეხილა რუსთავი 2-ის საქმე:

"ხსენებული განცხადება არ შეესაბამება სინამდვილეს და მასში ინფორმაცია არ არის სრულყოფილად მითითებული. აბსოლუტურად უსაფუძვლოა მოსაზრება იმის თაობაზე, რომ სააპელაციო სასამართლოში რუსთავი 2-ის საქმის განხილვაში მონაწილეობის უფლება არ ჰქონდა მოსამართლე შორენა ყაველაშვილს და მოვუწოდებთ ყველას თავი შეიკავოს იმგვარი ინფორმაციის გავრცელებისგან, რომელიც ხელს შეუწყობს საზოგადოების შეცდომაში შეყვანას".

სააპელაციო სასამართლოს განცხადებით, მოსამართლე შორენა ყაველაშვილს იუსტიციის უმაღლეს სკოლაში გავლილი აქვს სამოქალაქო სამართლის სრული 18 თვიანი კურსი და შესაბამისად წარმატებით აქვს ჩაბარებული გამოცდები, რითაც დასტურდება მისი უნარები სამოქალაქო სამართალში. გარდა ამისა, მოსამართლე შორენა ყაველაშვილი წლების განმავლობაში სამოსამართლეო საქმიანობას ახორციელებს სწორედ სამოქალაქო სამართლის მიმართულებით და განხილული აქვს 1000- ზე მეტი სამოქალაქო საქმე.

განცხადებაში წერია, რომ მოქმედ კანონმდებლობაში არ არსებობს არავითარი შეზღუდვა მოსამართლემ განიხილოს სხვა სპეციალობის საქმე.

სასამართლო აცხადებს, რომ მოსამართლე შორენა ყაველაშვილის მონაწილეობა რუსთავი 2-ის საქმის განხილვაში, სრულ შესაბამისობაშია საქართველოს კანონმდებლობის მოთხოვნებთან.

დღეს, 9 ივნისს, ტელეკომპანია რუსთავი 2-ის გენერალურმა დირექტორმა ნიკა გვარამიამ განაცხადა, რომ თბილისის სააპელაციო სასამართლოს მოსამართლე შორენა ყველაშვილი, რომელმაც რუსთავი 2-ის საქმე განიხილა, არაუფლებამოსილია განიხილოს სამოქალაქო დავა, რადგან მას სპეციალიზაცია მიღებული აქვს სისხლის სამართლის მიმართულებით.