მოკლედ: პარლამენტის იურიდიულ საკითხთა კომიტეტმა მხარი დაუჭირა საპარლამენტო უმრავლესობის მიერ წარდგენილ და ხელისუფლების მიერ მხარდაჭერილ რუსულ კანონს.

  • ამას წინ უძღოდა თითქმის 12-საათიანი განხილვა, ოპოზიციონერი დეპუტატების წინააღმდეგობა კომიტეტზე, პარლამენტის შენობის გარეთ კი სახალხო პროტესტი.

ეს ნიშნავს, რომ: საქართველოს პარლამენტი ხვალ, 16 აპრილს პირველი მოსმენით განიხილავს რუსულ კანონს პლენარულ სხდომაზე.

რა ხდება დღეს: კომიტეტის სხდომა ხმაურითა და ფიზიკური დაპირისპირებით მიმდინარეობს — მას შემდეგ, რაც პარტია მოქალაქეების ლიდერმა, ალეკო ელისაშვილმა საპარლამენტო უმრავლესობის ლიდერსა და რუსული კანონის წარმდგენს, მამუკა მდინარაძეს დაარტყა, ალეკო ელისაშვილს ქართული ოცნების რამდენიმე დეპუტატი ფიზიკურად, ჯგუფურად გაუსწორდა.

განხილვა პოლიტიკური ცენზურით: იურიდიული კომიტეტის თავმჯდომარემ ანრი ოხანაშვილმა მიკროფონი გაუთიშა პარლამენტის ოპოზიციონერ დეპუტატს, ხატია დეკანოიძეს, მხოლოდ იმის გამო, რომ საპარლამენტო განხილვისას მან გამოიყენა ფრაზა — რუსული კანონი.

გაიგე მეტი: ოხანაშვილმა ოპოზიციონერ ქალ დეპუტატებს დარბაზი დაატოვებინა (ვიდეო)