ისლანდიის პოლიცია საქართველოს მოქალაქეს, 22 წლის ნიკა ბეგაძეს ეძებს, რომელიც ადგილობრივი მედიის, Visir-ის ინფორმაციით, გულფოსის ჩანჩქერში ჩავარდა. ამავე მედიის ცნობით, ის ისლანდიაში თავშესაფრის მაძიებლის სტატუსით იყო.

კიდევ ერთი ადგილობრივი მედიასაშუალება, Ruv წერს, რომ ბეგაძე 19 ივლისს ჩავარდა ჩანჩქერში. მისი ვინაობა კი, იმ მანქანის საშუალებით დადგინდა, რომელიც ნაქირავები ჰქონდა.

საქართველოს საგარეო საქმეთა სამინისტროდან On.ge-ს აცნობეს, რომ ისლანდიის სამძებრო და სამაშველო სამსახურს დაუკავშირდნენ, სადაც განუცხადეს, რომ ბეგაძე 19 ივლისს დღის 5 საათამდე შევიდა გულფოსის ჩანჩქერში, რის შემდეგაც დაკარგულად მიიჩნევა. საგარეო საქმეთა სამინისტროში ამბობენ, რომ იმის მიუხედავად, რომ დაკარგულის ცოცხლად პოვნის იმედი აღარ არსებობს, ძებნა კვლავ გრძელდება.

უწყების პრესსამსახურის ინფორმაციით, შემთხვევის შესახებ ინფორმირებულია ბეგაძის ოჯახი თბილისში.