რუსთავი 2-ის გენერალური დირექტორი აცხადებს, რომ ტელეკომპანია იმედმა გაბერილი ხელფასებით რუსთავი 2-ის თანამშრომლები გადაიბირა. გვარამიას თქმით, იმედი სახელმწიფო საგადასახადო ინსტიტუციებისა და სასამართლო ინსტიტუციების ხელშეწყობით, "გუდავს" ტელეკომპანია რუსთავი 2-ს.

"იმედს გადაბირებული ჰყავს ჩვენი პროდაქშენის ნახევარი განყოფილება. დღეს დადგა იმ ფაქტის წინაშე, რომ ადამიანები, რომლებიც წლების განმავლობაში ამ ტელეკომპანიაზე ავად თუ კარგად მუშაობდნენ, უნდა დარჩნენ სამსახურის გარეშე, მხოლოდ იმიტომ, რომ დაზიანდეს ტელეკომპანია რუსთავი 2, მხოლოდ იმიტომ, რომ აქედან წაიყვანეს ადამიანები სრულიად არანორმალური და გაბერილი ხელფასებით. დიახ, ეს არის სწორედ არაკონკურენტუნარიანი გარემო",- განაცხდა ნიკა გვარამიამ.

რამდენიმე დღის წინ On.ge-ს რუსთავი 2-ისა და ტელეკომპანია იმედის გენერალურმა დირექტორმა დაუდასტურეს, რომ არხის საერთაშორისო პროექტების მენეჯერები დემნა ჯაფარიძე და გიორგი ხაბურზანია ტელეკომპანია იმედში გადავიდნენ. გვარამიამ მაშინ On.ge-ს განუცხადა, რომ რამდენადაც მისთვის ცნობილია, ჯაფარიძე და ხაბურზანია სხვა არხზე ფინანსური ინტერესის გამო წავიდნენ.

პროდაქშენის თანამშრომლების გადასვლამდე, არხი დატოვა სპორტის ახალი ამბების წამყვანმა დიმიტრი ობოლაძემაც, რომელიც თითქმის 20 წელი მუშაობდა რუსთავი 2-ზე. მაშინ ობოლაძემ იმედზე გადასვლის ერთ-ერთ მიზეზად ფინანსური შეთავაზება დაასახელა.