რა ხდება: საქართველოს სტატისტიკის ეროვნული სამსახურის მიერ, 29 თებერვალს გამოქვეყნებული მონაცემების თანახმად, 2023 წელს 2022 წელთან შედარებით, საქართველოში უფრო მეტი ადამიანი კვდება, ვიდრე იბადება.

  • საქსტატის მონაცემებში, უარყოფითი ბუნებრივი მატების სხვაობა მინუს 2 542 ერთეულით განისაზღვრა.
  • უარყოფითი ბუნებრივი მატება გულისხმობს სხვაობას ცოცხლად დაბადებულთა და გარდაცვლილთა რიცხოვნობას შორის.

დეტალები: ამას "საგანგაშოს" უწოდებს რომან გოცირიძე, საქართველოს პარლამენტის წევრი, ევროოპტიმისტების დამფუძნებელი და მთავარ მიზეზად ემიგრაციას ასახელებს.

  • მას, შედარებისთვის მოჰყავს სომხეთის ანალოგიური მაჩვენებლები, აზერბაიჯანთან ბოლო საომარი მოქმედებებისას ადამიანთა გარდაცვალების კონტექსტში:

რომან გოცირიძე: "სომხეთში, რომლის მოსახლეობა ერთი მილიონით ნაკლებია საქართველოს მოსახლეობაზე, რომელმაც 5 ათასზე მეტი ადამიანი დაკარგა ბოლო საომარი მოქმედებების დროს, 2023 წელს 12 ათასით მეტი ადამიანი დაიბადა, ვიდრე გარდაიცვალა, ანუ ბუნებრივი მატების მაჩვენებელი დადებითია.

  • საქართველოში, ათი წელიწადია, ეს მაჩვენებელი მკვეთრად კლებულობს და ბოლო ოთხი წელიწადია, სიკვდილიანობა მეტია დაბადებულებთან შედარებით — ქვეყანაში, წინა წელს, 2 542 ადამიანით მეტი გარდაიცვალა, ვიდრე დაიბადა. მდგომარეობა საგანგაშოა. მთავარი მიზეზი ემიგრაციაა."

კონტექსტი: 2023 წელს, საქართველოში ცოცხლად დაბადებული ბავშვების რიცხოვნობა, 2022 წელთან შედარებით, 5 %-ით შემცირდა.

ცოცხლად დაბადებულთა რიცხოვნობა დაბადების რიგითობის მიხედვით

ცოცხლად დაბადებულთა რიცხოვნობა დაბადების რიგითობის მიხედვით

ფოტო: საქსტატი

გაზრდილია ბავშვთა მოკვდაობის კოეფიციენტი ორ კატეგორიაში — როგორც ჩვილთა, ასევე, 5 წლამდე მოკვდაობის მონაცემის მიხედვით.

ბავშვთა მოკვდაობის კოეფიციენტი (1 000 ცოცხლად დაბადებულზე) სქესის მიხედვით

ბავშვთა მოკვდაობის კოეფიციენტი (1 000 ცოცხლად დაბადებულზე) სქესის მიხედვით

ფოტო: საქსტატი

გაიგე მეტი: საქართველოში უფრო მეტი ადამიანი კვდება, ვიდრე იბადება — საქსტატი