რა ხდება: რუსულენოვანი მედიასაშუალებების თანახმად, რუსეთის საზღვაო ძალების მეთაური, ადმირალი ნიკოლაი ევმენოვი თანამდებობიდან გაათავისუფლეს.

  • გამოცემები ფონტანკა და იზვესტია ინფორმაციას საკუთარ წყაროებზე დაყრდნობით ავრცელებენ და აღნიშნავენ, რომ ცვლილების შესახებ უკვე მიაწოდეს ინფორმაცია პერსონალსაც.

დეტალები: საზღვაო ძალების მეთაურის მოვალეობის შემსრულებლად სავარაუდოდ, ჩრდილოეთის ფლოტის მეთაური ალექსანდრე მოისეევი დაინიშნა.

  • ამის შესახებ წერს ზოგიერთი ანონიმური ტელეგრამ-არხიც, რომლებიც მხარს უჭერენ რუსეთის ომს უკრაინაში, თუმცა, ინფორმაცია, ოფიციალურად ჯერ არ დადასტურებულა.
  • ცვლილების შესახებ არც რუსეთის თავდაცვის სამინისტროს განუცხადებია და ვებგვერდზეც მეთაურად ისევ ევმენოვია მითითებული, რომელიც ამ პოზიციას 2019 წლიდან იკავებს.

კონტექსტი: ინფორმაცია რუსეთის საზღვაო ძალების მეთაურის ცვლილების შესახებ ვრცელდება იმ ფონზე, როდესაც უკრაინა საუბრობს, რომ 10 მარტის დილიდან შავ ზღვაში რუსეთის სამხედრო-საზღვაო ძალების არცერთი გემი არ იმყოფებოდა;

  • ამავდროულად, უკრაინის მიხედვით, სამი რუსული ხომალდი ხმელთაშუა ზღვაშია, მეოთხე კი აზოვის ზღვაში;
  • 5 მარტს უკრაინამ განაცხადა, რომ რუსებს შავ ზღვაში გაუნადგურა საპატრულო გემი სერგეი კოტოვი ქერჩის სრუტესთან;
  • უკრაინელები აცხადებენ, რომ გემს თავს დაესნენ დრონებით და თავდასხმის შედეგად, სულ მცირე, 27 ადამიანი დაიჭრა რუსული გემის ეკიპაჟიდან, შვიდი კი დაიღუპა.

მოკლედ — რუსების განადგურებულ გემზე: სერგეი კოტოვი შავი ზღვის ფლოტის ახალი საპატრულო გემია, რომელიც ექსპლუატაციაში შევიდა 2022 წლის გაზაფხულზე.

  • ოფიციალური ინფორმაციით, გემი ეკიპაჟის 60 წევრზეა გათვლილი.

ბოლო ხაზი: როგორც ეხო კავკაზა პროექტ ოგუხ-ზე დაყრდნობით წერს, რუსეთის მიერ უკრაინაში დაწყებული სრულმასშტაბიანი ომის შემდეგ, რუსეთმა შავი ზღვის ფლოტის მეოთხედზე მეტი დაკარგა, მათ შორის, მთავარი სარაკეტო კრეისერი მოსკოვი.