მოკლედ: რუსეთის საოკუპაციო ძალების წარმომადგენლებმა, ქარელის მუნიციპალიტეტის სოფელ ტახტისძირის მიმდებარედ, ოკუპირებულ ტერიტორიაზე, უკანონოდ დააკავეს საქართველოს მოქალაქე.

  • ინფორმაციას საქართველოს უსაფრთხოების სამსახური ავრცელებს.

დეტალები: სუს-ში ამბობენ, რომ ინციდენტის შესახებ ინფორმაციის მიღებისთანავე გააქტიურეს ევროკავშირის სადამკვირვებლო მისიის მიერ ოპერირებული ცხელი ხაზი, რაც მსგავსი შემთხვევებისთვის, სტანდარტული პროცესია, ისევე, როგორც ჟენევის საერთაშორისო დისკუსიების თანათავმჯდომარეებისა და საერთაშორისო პარტნიორების ინფორმირება უკანონო დაკავების მორიგი ფაქტის თაობაზე.

  • "ამოქმედებულია ყველა არსებული მექანიზმი უკანონოდ დაკავებული საქართველოს მოქალაქის უმოკლეს ვადებში გასათავისუფლებლად", — აცხადებენ სუს-ში.

პრობლემაა, რომ საქართველოს ოკუპირებულ ტერიტორიებზე სისტემატურად ხდება:

  • ადამიანების გატაცება და უკანონო პატიმრობა;
  • განგრძობადი ბორდერიზაციით, არაერთმა ადგილობრივმა დაკარგა მიწა თუ სახლი, რომელიც ახალი ე.წ. "სასაზღვრო ნიშნების" აღმართვის შემდეგ, გამყოფი ხაზის მიღმა მიაქციეს ოკუპანტებმა;
  • მუდმივია დაშინებისა და შევიწროების შემთხვევები;
  • ხდება ეთნიკურად ქართველი მოსახლეობის მიზანმიმართული დისკრიმინაცია;
  • ადამიანებს უზღუდავენ მშობლიურ ენაზე განათლების მიღების უფლებას;
  • და ოკუპანტები ატარებენ რუსიფიკაციისა და მოსახლეობის ეთნიკური იდენტობის შეცვლის, მათი ასიმილაციისკენ მიმართულ პოლიტიკას