მოკლედ: პროკურატურის ინფორმაციით, ზესტაფონის რაიონულმა სასამართლომ ტრეფიკინგის ფაქტზე ბრალდებული დამნაშავედ ცნო და 12 წლით თავისუფლების აღკვეთა მიუსაჯა.

რა მოხდა: ტაილანდის ერთ-ერთმა დასაქმების სააგენტომ, ტაილანდის სამი მოქალაქე სილამაზის სალონში მუშაობის დაპირებით, მოტყუებით ჩამოიყვანა ბათუმში.

  • ბრალდებულმა, რომელიც საქართველოს მოქალაქე არ არის, დაზარალებულები ზესტაფონში, მის დროებით სარგებლობაში არსებულ საცხოვრებელ სახლში მიიყვანა, ჩამოართვა პასპორტები და სახლის დატოვების უფლებას არ აძლევდა.
  • პროკურატურის ინფორმაციით, ბრალდებული უცხო ქვეყნის მოქალაქეებს, გარკვეული ანაზღაურების სანაცვლოდ, სექსუალური მომსახურების გაწევას აიძულებდა, "ხოლო ექსპლუატაციის გზით გამომუშავებული თანხის დიდ ნაწილს თავად ისაკუთრებდა".

ბოლო ხაზი: დაკავებულს ბრალდება საქართველოს სისხლის სამართლის კოდექსის 143 პრიმა მუხლის მესამე ნაწილის ბ ქვეპუნქტით წარედგინა, რაც ორი ან მეტი პირის მიმართ ადამიანით ვაჭრობას გულისხმობს.