რა ხდება: თბილისში, კეკელიძის #1-ში ხატიაშვილების ოჯახის გამოსახლების პროცესი დასრულდა.

• აღსრულების პოლიციამ ფიზიკური ძალა გამოიყენა.
• პროცესს დაპირისპირება მოჰყვა.
• დაკავებულია რამდენიმე პირი — მათ შორის, რამდენიმე მათგანი გამოსახლების პროცესამდე, რამდენიმე — გამოსახლების პროცესისას.

დეტალები: ადგილზე ისევ რჩებიან მოქალაქეები და აქტივისტები. ისინი მოუწოდებენ მოსახლეობას, შეუერთდნენ პროტესტს. იქ არიან პლატფორმა კომენტარის წარმომადგენლებიც, რომლებიც მიიჩნევენ, რომ ცალკეული ოჯახების პრობლემები საკანონმდებლო ცვლილებებმა უნდა გამოასწოროს.

• "საქმე ის არის, რომ კანონდებლობა მორგებულია მევახშეების ინტერესებზე. ვნახეთ ეს უსამართლობა, რომ ოჯახს სესხის ძირზე სამჯერ მეტი აქვს გადახდილი, მაგრამ ვნახეთ, რა ფორმებით მოხდა მათი გამოსახლება ამ ზამთარში. ბევრ ქვეყანაში ზამთარში მოქალაქეთა გამოსახლება აკრძალულია. ჩვენი კანონმდებლობა არის შესაცვლელი და ის ადამიანზე ორიენტირებული უნდა გახდეს", — უთხრა On.ge-ს ვახუშტი მენაბდემ, პლატფორმა კომენტარის თანადამფუძნებელმა.

მენაბდე იმედოვნებს, რომ სპონტანურად დაწყებული წინააღმდეგობა გაიზრდება და "გარდაიქმნება უფრო კონკრეტულ მოთხოვნებში და მოძრაობაში, რომელიც ამ სამევახშეო სისტემას დაუპირისპირდება."

• ვახუშტი მენაბდეს ვკითხეთ, როგორი იქნებოდა ასეთ ვითარებაში სახელმწიფოს საუკეთესო მიდგომა გამოსახლებულ ოჯახებთან დაკავშირებით, რადგან ოფიციალურ უწყებებს ამ დრომდე არაფერი უთქვამთ, უზრუნველყოფენ თუ არა გამოსახლებულ ოჯახს საცხოვრებელი ფართით: "სახელმწიფო ვალდებულია, უსახლ-კარო ადამიანს, ვისაც არ აქვს ფინანსური შესაძლებლობა, გამოუყოს საცხოვრებელი. შესაბამის ვალდებულებას აკისრებს კანონი ადგილობრივ თვითმმართველობას", — გვითხრა მან.

რას ამბობს აღსრულების ეროვნული ბიურო: უწყებამ განცხადება გაავრცელა, რომელშიც უარყო გავრცელებული ინფორმაცია, თითქოს, პროცესისას ადგილი ჰქონდა მათი მხრიდან გაზის გამოყენებას და ამ ინფორმაციას სიცრუე უწოდა.

განცხადებიდან: "აღნიშნული გამოსახლების პროცესი აღსრულების პოლიციის მიერ 6 წლის განმავლობაში 5-ჯერ იყო გადადებული. ამ დროის მანძილზე აღსრულების ეროვნულმა ბიურომ საქმის მორიგებით დასრულების მიზნით, გაატარა ყველა ღონისძიება, აქტიურად მიმდინარეობდა მხარეებს შორის მოლაპარაკებები, სადაც კრედიტორი მოვალეს სთავაზობდა ალტერნატიულ საცხოვრებელ ფართს, რაზედაც მოვალემ განაცხადა უარი. აღსრულების ეროვნული ბიურო გამოსახლების პროცესს ახორციელებს კანონის სრული დაცვით. მოვუწოდებთ მოქალაქეებს, დაემორჩილონ პოლიციის კანონიერ მოთხოვნებს."

რა ვიცით ხატიაშვილების ოჯახის პრობლემის შესახებ: ხატიაშვილების ოჯახის (კეკელიძის ქ. 1) გამოსახლება 2019 წლიდან დღემდე, უკვე მეხუთედ ჩაინიშნა; აქედან ბოლო მცდელობა 2023 წლის 23 იანვარს იყო, თუმცა, მაშინ პროტესტის გამო, გასახლების პროცესი შეჩერდა.

• 24 და 26 იანვარს, აღსრულების ეროვნული ბიურო კაკიაშვილებისა და ბალახაძეების ოჯახების გამოსახლების გეგმავს.

• "აღსანიშნავია, რომ, როგორც ირკვევა, სამივე ოჯახი თანახმაა, დაფაროს ძირითადი ფინანსური დავალიანება, თუმცა ამ ეტაპზე მათ ამის საშუალება არ ეძლევათ", — აცხადებს სოციალური სამართლიანობის ცენტრი (SJC).

• ორგანიზაცია, ასევე, წერს, რომ მსგავსი შემთხვევები საქართველოში გამონაკლისს არ წარმოადგენს: "მანკიერ ფულად-საკრედიტო პოლიტიკაში კრედიტორთა უმთავრესი ინტერესი იპოთეკით დატვირთული ქონების დაუფლებაა — მევახშეები ბოროტად სარგებლობენ მსესხებლის მძიმე სოციალურ-ეკონომიკური მდგომარეობით, რასაც წლების განმავლობაში, სასესხო ხელშეკრულებების კაბალური პირობებით დადება და საცხოვრისის დაკარგვის მომეტებული რისკები მოჰყვება", — ნათქვამია მათ განცხადებაში.