რა ხდება: თბილისის საქალაქო სასამართლომ დააკმაყოფილა გოგა რაზმაძის მოთხოვნა დროებითი განჩინების მიღების თაობაზე და და შსს-ს, სასამართლოს დავის გადაწყვეტამდე, გოგა რაზმაძის პოზიციაზე სხვა პირის დანიშვნა აუკრძალა.

• ამის შესახებ საქართველოს ახალგაზრდა იურისტთა ასოციაცია (საია) წერს.

რა ვიცით გოგა რაზმაძის საქმეზე: 12 ივლისს, როდესაც ის შსს-ს მოქმედი თანამშრომელი იყო და იკავებდა ადამიანის უფლებათა დაცვისა და გამოძიების ხარისხის მონიტორინგის დეპარტამენტის რეგიონული სამმართველოს უფროსის პოზიციას, "ფეისბუქზე" დაწერა საჯარო სტატუსი, სადაც შსს-ს მაღალჩინოსნებს დისკრიმინაციულ მოპყრობაში ადანაშაულებდა.

• ჰყვებოდა, რომ ადამიანის უფლებათა დეპარტამენტში არსებულ პრობლემებზე საუბრისა და კრიტიკის შემდეგ, გენერალურ ინსპექციაში დაიბარეს და "საქმე გაურჩიეს".

საია წერს, რომ

• რაზმაძის პოსტზე, სპეციალურ საგამოძიებო სამსახურს, საკუთარი ინიციატივით რეაგირება არ მოუხდენია.
• 14 ივლისს რაზმაძემ განცხადებით მიმართა სპეციალურ საგამოძიებო სამსახურს და მოითხოვა გამოძიების დაწყება.
• ნაცვლად გამოძიების დაწყებისა, საგამოძიებო სამსახურის გამომძიებელმა, გოგა რაზმაძე, შემდგომი გასაუბრების მიზნით, დაიბარა საგამოძიებო სამსახურში.
• 27 ივლისს ცნობილი გახდა, რომ სპეციალურმა საგამოძიებო სამსახურმა არ დაიწყო გამოძიება და გოგა რაზმაძის განცხადება, რომლითაც გამოძიების დაწყება იყო მოთხოვნილი, გადაუგზავნა იმ უწყების უფროსს, რომლის მოადგილესაც რაზმაძე დისკრიმინაციულ მოპყრობაში ადანაშაულებდა.
• თავის მხრივ, გენერალურმა ინსპექციამ საქმის სპეციალური საგამოძიებო სამსახურის მიერ გადაგზავნილი განცხადებაზე სამსახურეობრივი შემოწმება არ დაიწყო.
• დამატებით, გოგა რაზმაძემ განცხადებით მიმართა გენერალურ პროკურატურას. პროკურატურამ განცხადების შეტანიდან დაახლოებით 1 თვის შემდგომ რაზმაძეს აცნობა, რომ გაესაუბრნენ გენინსპექციის თანამშრომლებს და დასკვნაში ჩაწერეს, რომ რაზმაძის მიმართ ადგილი არ ჰქონია რაიმე სახის დანაშაულის ჩადენას. დასკვნა გაკეთდა ისე, რომ გოგა რაზმაძე არც გამოკითხულა.
• რაზმაძემ მიმართა სახალხო დამცველსაც, რომელმაც შეწყვიტა საქმე დისკრიმინაციული მოპყრობის არარსებობის გამო.
• საბოლოოდ, გოგა რაზმაძემ საკუთარი უფლებებისა და თავისუფლებების დასაცავად 24 ნოემბერს ადამიანის უფლებათა ევროპულ სასამართლოს მიმართა.

10 ნოემბერს, შსს გენერალურმა ინსპექციამ მოამზადა დასკვნა გოგა რაზმაძის სამსახურიდან გათავისუფლების შესახებ.

შესაბამისად, გოგა რაზმაძემ ამ საკითხზე მიმართა თბილისის საქალაქო სასამართლოს. სარჩელით იგი ითხოვს გათავისუფლების უკანონოდ ცნობას, სამსახურში აღდგენას, დისკრიმინაციული მოპყრობის ფაქტის დადგენასა და მორალური ზიანის ანაზღაურებას.

• თბილისის საქალაქო სასამართლოს 2023 წლის 21 დეკემბრის განჩინებით, დაკმაყოფილდა გოგა რაზმაძის მოთხოვნა დროებითი განჩინების მიღების თაობაზე. სასამართლომ სრულად გაიზიარა მოსარჩელის მოთხოვნა და შინაგან საქმეთა სამინისტროს სასამართლოს დავის გადაწყვეტამდე, გოგა რაზმაძის პოზიციაზე სხვა პირის დანიშვნა აუკრძალა.

გოგა რაზმაძის ინტერესებს თბილისის საქალაქო და ადამიანის უფლებათა ევროპულ სასამართლოში საია იცავს.