რუსეთის უშიშროების სამსახურმა, FSB-მ, 1999 წელს დაღესტანში ჩეჩენი ბოევიკების შეჭრაში სავარაუდო მონაწილეობისთვის, დაღესტნელი მამაკაცი დააკავა.

სამშაბათს FSB-მ დააკავა იბრაგიმ მაგომედევი, დაღესტნის ხასავიურტის რაიონის სოფელ ნოვოსასითლიში. მას, დაღესტანში, 1999 წელს შამილ ბასაევისა და იბნ ალ-ხატაბის შეჭრის დროს, კრიმინალურ დაჯგუფებასა შეიარაღებულ ამბოხში მონაწილეობა, ასევე — პოლიციელის მკვლელობის მცდელობაში ედება ბრალი.

"ინტერფაქსს" FSB-ში განუცხადეს, რომ რუსეთის საგამოძიებო კომიტეტთან ერთად, მოიპოვეს უტყუარი მტკიცებულებები, რომ 1973 წელს დაბადებული, დაღესტანში მცხოვრები, რუსეთის მოქალაქე იბრაგიმ მაგომედოვი ამ დანაშაულში ნამდვილად მონაწილეობდა, თუმცა ის ამისთვის კანონით არ დასჯილა.

მათ, ასევე თქვეს, რომ თავდასხმაში მონაწილე სხვა პირებს ჯერ კიდევ ეძებენ.

რუსეთის საგამოძიებო კომიტეტი იტყობინება, რომ 1999 წლის შეჭრის გამო, 80 ადამიანი უკვე ნასამართლევია, ხოლო 28 იძებნება.

ჩეჩენი ისლამისტური ძალები შამილ ბასაევისა და იბნ ალ-ხატაბის მეთაურობით დაღესტანში 1999 წლის აგვისტოში შეიჭრნენ, შეიარაღებული მეამბოხეების მხარდასაჭერად.

ისინი დაღესტნიდან ერთი თვის შემდეგ გააძევეს, რადგან რუსეთმა დაღესტანზე სრული კონტროლი აღადგინა. ერთთვიან ბრძოლას ათასობით ადამიანი ემსხვერპლა, ათასობით კი — დევნილად იქცა.

მიუხედავად იმისა, რომ შეჭრას ეწინააღმდეგებოდა იჩქერიის ასლან მასხადოვის მთავრობა, ეს რუსეთის ხელისუფლებამ გამოიყენა, როგორც ჩეჩნეთის მეორე ომის დაწყების ერთ-ერთი მთავარი მიზეზი.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.