რა ხდება: ჩრდილოეთ მაკედონიაში, ეუთოს მინისტერიალისთვის 50-ზე მეტი ქვეყნის დიპლომატები იკრიბებიან.

  • იმის გამო, რომ ღონისძიებას რუსეთის საგარეო საქმეთა მინისტრი, სერგეი ლავროვიც ესწრება, სკოპიეში ჩასვლაზე უარი თქვეს უკრაინამ, ესტონეთმა, ლატვიამ და ლიეტუვამ.
  • ამ ქვეყნების საგარეო საქმეთა მინისტრებმა გაავრცელეს საერთო განცხადებაც, სადაც წერია, რომ ლავროვის დასწრება შეხვედრებზე რუსეთს პროპაგანდის კიდევ ერთ საშუალებას მისცემს.
  • ჩრდილოეთ მაკედონიის დედაქალაქში, მცირე ხნით იმყოფებოდა აშშ-ის სახელმწიფო მდივანი ენტონი ბლინკენიც, ის სკოპიედან ისრაელში გაფრინდა. ბლინკენი არ შეხვედრია ლავროვს, რომელიც სკოპიეში ოთხშაბათს საღამოს ჩაფრინდა.

ლავროვის "გრძელი გზა" სკოპიემდე: როგორც რუსული პროპაგანდისტული მედიასააგენტო TASS წერს, ბულგარეთმა უარი უთხრა რუსეთს, ლავროვის თვითმფრინავისთვის საჰაერო სივრცის გახსნის შესახებ.

  • ამიტომ, რუსეთის საგარეო უწყების ხელმძღვანელს, სკოპიეში ჩაფრენა, თურქეთისა და საბერძნეთის საჰაერო სივრცეების გამოყენებით მოუხდა.
  • TASS-ის ინფორმაციით, ბულგარეთმა თქვა, რომ არ შეუშვებდა სივრცეში თვითმფრინავს, თუ ბორტზე საგარეო საქმეთა სამინისტროს წარმომადგენელი, მარია ზახაროვაც იქნებოდა, რადგან ზახაროვა ევროკავშირის მიერ არის სანქცირებული.

საქართველოს დელეგაცია მინისტერიალზე: სკოპიეში ღონისძიებას ესწრება საქართველოს დელეგაციაც, რომელსაც საგარეო საქმეთა მინისტრი, ილია დარჩიაშვილი ხელმძღვანელობს.

  • საქართველოს საგარეო უწყების ინფორმაციით, დარჩიაშვილმა მონაწილეობა მიიღო არაფორმალური ხასიათის შეხვედრაში, სადაც განხილვის თემა რეგიონსა და მსოფლიოში არსებული გამოწვევების ფონზე ეუთო-ს ეფექტიანი ფუნქციონირების საკითხი იყო.
  • ასევე, დარჩიაშვილი მონაწილეობას მიიღებს და სიტყვით გამოვა მინისტრთა კომიტეტის სხდომაზე.
  • ის მართავს ორმხრივ შეხვედრებს ევროპელ კოლეგებთან.

საგარეო საქმეთა მინისტრის მონაწილეობას მინისტერიალში აპროტესტებს ოპოზიციის ნაწილი, ისინი ამბობენ, რომ "ოკუპანტი ლავროვის გვერდით ჯდომა ღირსების შემლახავია".

ქართული ოცნების თავმჯდომარემ, ირაკლი კობახიძემ კი თქვა, რომ როცა ღონისძიებაზე ჩადიან ბლინკენი და ბორელი და არ ჩადის საქართველოს საგარეო საქმეთა მინისტრი, "სულ მცირე, გაუგებარი იქნება ასეთი რამ".