სპილო, სახელად მალი, რომელსაც მსოფლიოს ყველაზე სევდიანი სპილოც შეარქვეს, მანილას ზოოპარკში ცოტა ხნის წინ მოკვდა. მალი 33 წლის განმავლობაში ფილიპინების ზოოპარკში მცხოვრები ერთადერთი სპილო იყო. მალი მთელი ამ ხნის განმავლობაში მარტო ცხოვრობდა და ყველაზე სევდიანი სპილოც სწორედ ამიტომ შეარქვეს.

წლების განმავლობაში მალის ისტორიამ ცხოველთა უფლებების დამცველი აქტივისტების ყურადღებაც მიიპყრო, რომელთა შორის პოლ მაკარტნიც იყო. მომღერალი დიდი ხნის განმავლობაში ცდილობდა, მალის ამბავი რაც შეიძლება მეტ ადამიანს გაეგო. პოლ მაკარტნიმ ფილიპინების პრეზიდენტს წერილიც კი მისწერა და მალის გათავისუფლება სთხოვა, თუმცა ეს მცდელობები უშედეგო აღმოჩნდა.

ფოტო: Getty Images

მალი, რომელსაც სიმსივნე ჰქონდა, ჯანმრთელობის გაუარესების შედეგად მოკვდა. სიკვდილამდე ცოტა ხნით ადრე მალის სუნთქვა გაურთულდა და მძიმე ტკივილებსაც განიცდიდა. ვეტერინარებმა მისი დახმარება სცადეს, თუმცა მალი იმ დღესვე მოკვდა.

ცხოველთა უფლებების დამცველი ორგანიზაციის, PETA-ის ცნობით, მალი წლების განმავლობაში იზოლირებული იყო, რის გამოც ცხოველი მარტოობასა და მოწყენილობას განიცდიდა. მიუხედავად იმისა, რომ მალის გათავისუფლებისთვის ბევრი ადამიანი იბრძოდა, ზოგი მაინც ამტკიცებდა, რომ სპილო არახელსაყრელ პირობებში სულაც არ იყო. "ის შეიძლება მარტოსული ჩანდა, თუმცა ჩვენ მუდამ მის გვერდით ვიყავით. მალი ყველას ესალმებოდა, ვინც კი ზოოპარკს ესტუმრებოდა", — განაცხადა მანილას მერმა.

ფოტო: Getty Image

მანილას მერმა ისიც დასძინა, რომ ფილიპინები შრი-ლანკას სთხოვს, ზოოპარკს კიდევ ერთი სპილო გადასცეს. ამის პასუხად, ცხოველთა უფლებების დამცველებმა განაცხადეს, რომ ბოლომდე იბრძოლებენ, რათა კიდევ ერთმა სპილომ მალის ბედი არ გაიზიაროს.