მოკლედ: ისრაელი აცხადებს, რომ ღაზის სექტორში საავადმყოფოს აფეთქებასთან კავშირი მათ არ აქვთ და ეს პალესტინელების მიერ, წარუმატებლად ნასროლმა რაკეტამ გამოიწვია.

  • ბრალდებას უარყოფს ჰამასი და ამტკიცებს, რომ საავადმყოფო ისრაელმა ააფეთქა.
  • ჰამასის ლიდერი, ისმაილ ჰანიე მომხდარზე პასუხისმგებლობას აშშ-ს აკისრებს.

რა მოხდა ქალაქ ღაზაში გასულ ღამეს: საავადმყოფოში, რომელსაც, პაციენტების გარდა, ათასობით დევნილი აფარებდა თავს, ძლიერი აფეთქება მოხდა.

  • ემსხვერპლა 500-მდე ადამიანი.

სტრიქონებს შორის: BBC წერს, რომ ალ-ალის ჰოსპიტალი სრულად ფინანსდებოდა ანგლიკანური ეკლესიის მიერ.

  • იერუსალიმში ანგლიკანური ეკლესიის წარმომადგენლის თქმით, საავადმყოფოს ტერიტორიას, დაახლოებით, 6 000 დევნილი აფარებდა თავს.
  • ეკლესიის წარმომადგენლის განმარტებით, ჰოსპიტალი ყველა პოლიტიკური ძალისგან დამოუკიდებელია.

რა რეაქცია მოჰყვა აფეთქებას მუსლიმურ ქვეყნებში: აფეთქებიდან მალევე, საპროტესტო აქციები დაიწყო დასავლეთ სანაპიროს ტერიტორიაზე მდებარე ქალაქ რამალაში, რომელიც სამართალდამცველებთან დაპირისპირებაში გადაიზარდა.

  • მანიფესტანტების წინააღმდეგ გამოიყენეს ცრემლსადენი გაზი.
  • საპროტესტო აქცია გაიმართა ლიბანის დედაქალაქ ბეირუთში - აქციის მონაწილეებმა აშშ-ის საელჩოს წინ ცეცხლი დაანთეს.
  • მანამდე კი ჰეზბოლამ - სამხედრო დაჯგუფებამ, რომელიც სამხრეთ ლიბანს მართავს და ომი ჰქონდა ისრაელთან 2006 წელს, განცხადება გაავრცელა, სადაც დაგმო მშვიდობიანი მოსახლეობის დახოცვა და ოთხშაბათი "მრისხანების უპრეცედენტო დღედ" დააანონსა.
  • საავადმყოფოს აფეთქება გააპროტესტეს იორდანიის დედაქალაქ ამანსა და თურქეთშიც, ქალაქ სტამბოლში.

ბოლო ხაზი: რამდენიმე საათში აშშ-ის პრეზიდენტ ჯო ბაიდენს ისრაელში ელოდებიან, მას, ასევე, დაგეგმილი ჰქონდა ვიზიტი იორდანიაში, სადაც არაბ ლიდერებს უნდა შეხვედროდა, თუმცა, თეთრი სახლის განცხადებით, იორდანიაში პრეზიდენტის ვიზიტი გადაიდო.