საქართველოს, მოლდოვისა და უკრაინის საკანონმდებლო ორგანოებმა ევროპარლამენტს მიმართეს. მიმართვაში ქვეყნების წარმომადგენლები აღნიშნავდნენ, რომ ევროპული მისწრაფებები და ერთმანეთისთვის პოლიტიკური მხარდაჭერის მიზანი აქვთ. საქართველოს პარლამენტის მიერ გავრცელებული ინფორმაციით, მიმართვის ინიციატორი საქართველოს პარლამენტის თავმჯდომარე, ირაკლი კობახიძე იყო.

"კიდევ ერთხელ ვადასტურებთ ჩვენს ერთგულებას ადამიანის ღირსების, თავისუფლების, დემოკრატიის, თანასწორობისა და კანონის უზენაესობის საერთო ღირებულებების მიმართ," - ვკითხულობთ წერილში, რომელშიც ასევე წერია, რომ ევროკავშირს აქვს ამბიცია, იყოს მყარი და სანდო პარტნიორი მისი აღმოსავლელი მეზობლებისთვის, საქართველოს, მოლდოვისა და უკრაინის წინაშე არსებული გეოპოლიტიკური გამოწვევების, მათ შორის, რუსეთის ხისტი და რბილი ძალის გათვალისწინებით.

წერილში აღნიშნულია, რომ ქვეყნებს სწამთ, 2017 წელს აღმოსავლეთ პარტნიორობის სამიტზე მიღებულ დეკლარაციაში საქართველოს, მოლდოვისა და უკრაინის ტერიტორიული მთლიანობისა და სუვერენიტეტის, ასევე, მათი ევროპული არჩევანისა და დღის წესრიგის ცალსახა მხარდაჭერა იქნება ასახული.

"გვწამს, რომ ევროკავშირის აღმოსავლეთ საზღვარზე დემოკრატიის, სტაბილურობისა და მდგრადი განვითარების ხელშეწყობა ევროპაში მშვიდობისა და უსაფრთხოების უზრუნველყოფის საუკეთესო საშუალებაა," - აღნიშნავენ საქართველოს, მოლდოვისა და უკრაინის საკანონმდელობო ორგანოების წარმოამდგენლები ევროპარლამენტისთვის მიწერილ მიმართვაში.