რა ხდება: აზერბაიჯანის ძალებმა მთიან ყარაბაღზე თავდასხმა დაიწყეს.

• როგორც OC Media წერს, სტეფანაკერტში საჰაერო იერიშის სირენების და აფეთქებების ხმა ისმის.
• მთიანი ყარაბაღის ყოფილი სახელმწიფო მინისტრები, არტაკ ბეგლარიანი და რუბენ ვარდანიანი ამბობენ, რომ აზერბაიჯანი სტეფანაკერტში მძიმე არტილერიას იყენებს.
• ასევე, მთიანი ყარაბაღში დაფუძნებული Telegram-ის არხი Infocom წყაროზე დაყრდნობით წერს, რომ ჩრდილო-აღმოსავლეთში მდებარე მარტაკერტიც თავდასხმის ქვეშაა.

აზერბაიჯანის თავდაცვის სამინისტროს განცხადებაში ნათქვამია, რომ ანტიტერორისტული ღონისძიებები დაიწყეს.

• უწყებამ ბოლო თვეებში დაძაბულობის კიდევ უფრო გაზრდის რამდენიმე მიზეზი დაასახელა — მათ შორის, სომხეთის მიერ აზერბაიჯანის არმიის პოზიციების სისტემატური დაბომბვა, საბრძოლო პოზიციების გაუმჯობესებაზე მუშაობა, სანგრების რაოდენობის გაზრდა.
• მათი მტკიცებით, დღეს, 19 სექტემბერს, აჰმედბეილი-ფიზული-შუშას გზატკეცილზე, სომხეთის შეიარაღებული ძალების სადაზვერვო-დივერსიული ჯგუფების დაყენებული ნაღმის აფეთქების შედეგად, მშვიდობიანი მოქალაქეები დაიღუპნენ; ხოლო მეორე ნაღმზე აფეთქების შედეგად მათი სამხედრო დაიღუპა და დაიჭრა.
• "ასეთი ფაქტები გაგრძელებაა სომხეთის მიზანმიმართული და სისტემატური ტერორისტული პოლიტიკისა, რომელსაც ახორციელებს აზერბაიჯანის წინააღმდეგ", — ვკითხულობთ განცხადებაში.
• აქვე ხაზგასმულია, რომ სამმხრივი დეკლარაციის დებულებების უზრუნველსაყოფად, ყარაბაღის ეკონომიკურ რეგიონში ფართომასშტაბიანი პროვოკაციების აღსაკვეთად, სომხეთის შეიარაღებული ძალების მათი ტერიტორიებიდან გასაყვანად, მათი სამხედრო ინფრასტრუქტურის გასანეიტრალებლად, ასევე, აზერბაიჯანის რესპუბლიკის კონსტიტუციური სისტემის აღსადგენად, რეგიონში ანტიტერორისტული ღონისძიებები დაიწყო.
• აზერბაიჯანი ირწმუნება, რომ სამოქალაქო დაწესებულებებს და ინფრასტრუქტურას არ ბომბავს და ფრონტის ხაზზე და სიღრმისეულად მაღალი სიზუსტის იარაღის გამოყენებით მხოლოდ სომხეთის შეიარაღებული ძალების პოზიციებს, მათ გრძელვადიან საცეცხლე პუნქტებსა და სამხედრო ობიექტებს ესვრის.
• "მიმდინარე აქტივობების შესახებ ინფორმირებული იქნა რუსეთის ფედერაციის სამშვიდობო კონტინგენტის სარდლობა და თურქეთ-რუსული ერთობლივი მონიტორინგის ცენტრის ხელმძღვანელობა", — წერია განცხადებაში.

სომხეთის თავდაცვის სამინისტროს განცხადებით, 14:00 საათისთვის სომხეთ-აზერბაიჯანის საზღვარზე ვითარება შედარებით სტაბილურია. ამ ეტაპზე მათ სხვა კომენტარი არ გაუკეთებიათ.

• "აზერბაიჯანმა, წამოაყენა ცრუ ბრალდება ტერორიზმის შესახებ არცახის წინააღმდეგ, ცეცხლი გაუხსნა სამხედრო ობიექტებს სხვადასხვა საშუალებებისა და იარაღის გამოყენებით", — განაცხადა ოპოზიციური საპარლამენტო ფრაქციის წევრმა, ტიგრან აბრაჰამიანმა.

დეტალები: დაშავებულების შესახებ ინფორმაცია არ გავრცელებულა.

• ანდრანიკ შირინიანმა, Freedom House-ის წარმომადგენელმა სომხეთში ტვიტერზე დაწერა, რომ თავდასხმები მიზნად ისახავდა საკომუნიკაციო ინფრასტრუქტურას და ამ ეტაპზე სტეფანაკერტში ქსელი შეზღუდვებით მუშაობს.
• რადიო თავისუფლების სომხურ ბიუროს ადგილობრივმა დამოუკიდებელმა ჟურნალისტმა განუცხადა, რომ არტილერია მძლავრად მუშაობს და უწყვეტი სროლაა, რის გამოც მოსახლეობამ თავი სარდაფებს შეაფარა.
• სოციალურ ქსელში, სავარაუდოდ, სტეფანაკერტში გადაღებული აფეთქების კადრები ვრცელდება.