წყვილი, რომელიც პარიზიდან სინგაპურისკენ მიფრინავდა, სინგაპურის ავიახაზებისგან ბილეთის ღირებულების დაბრუნებას ითხოვს. მიზეზი 13-საათიანი ფრენისას მათ გვერდით მჯდომი ძაღლია, რომელიც, წყვილის თქმით, "დორბლმორეული იყო, ხვრინავდა და გაზებს უშვებდა".

ახალზელანდიელი გილ და უორენ პრესები ამბობენ, რომ პრემიუმ ეკონომ კლასის ორი ბილეთი შეიძინეს, თუმცა, ფრენისას შექმნილი დისკომფორტის გამო ეკონომ კლასში გადასხდომა მოუწიათ. მათი თქმით, წინასწარ არც იცოდნენ, რომ ძაღლის გვერდით მოუწევდათ მგზავრობა.

"რაღაც ხმა გავიგე, ხმამაღალი ფრუტუნის", — იხსენებს გილი, — "მეგონა, ჩემი ქმრის ტელეფონი იყო, მაგრამ რომ დავიხედე, მივხვდი, ძაღლის სუნთქვა მესმოდა".

მისი თქმით, ეს ყველაფერი აუტანელი მაშინ გახდა, როცა ცუგამ ჯერ უორენის ფეხებთან მოიკალათა, მერე კი, შუა გზაში, გაზების გამოშვებაც დაიწყო.

"ძაღლი სკამების რიგებს შორის ვერ გაჩერდებოდა, ამიტომ ჩვენკენ მოიწია და თავი ჩემი ქმრის ფეხებთან დადო", — ჰყვება გილი, — "ჩემს ქმარს შორტები ეცვა და ძაღლის ნერწყვი ფეხზე დასდიოდა".

როცა წყვილმა ჩივილით ბორტგამცილებელს მიმართა, ისინი ეკონომ კლასში გადაიყვანეს და დაჰპირდნენ, რომ მოგვიანებით დაუკავშირდებოდნენ კიდეც. თუმცა, მათი თქმით, ავიაკომპანია მხოლოდ ორი კვირის დაგვიანებით დაუკავშირდა და სასაჩუქრე ვაუჩერები შესთავაზა. გილმა და უორენმა შეთავაზება იუარეს და თქვეს, რომ ეს თანხა პრემიუმ ეკონომ კლასიდან ეკონომ კლასში გადაჯდომით დაკარგულ თანხას ვერ ანაზღაურებდა. წყვილს კიდევ ერთხელ შესთავაზეს უფრო ძვირიანი სასაჩუქრე ვაუჩერები, თუმცა, ისინი მაინც თანხის დაბრუნებას ითხოვენ.

სინგაპურის ავიახაზები კი განმარტავს, რომ ისინი ცდილობენ, მომხმარებელს წინასწარ შეატყობინონ, თუ დამხმარე ძაღლის გვერდით შეიძლება მოუწიოთ ჯდომა. ხოლო თუკი ისინი ადგილის შეცვლას მოისურვებენ, შესაძლებლობის შემთხვევაში, იმავე სივრცეში გადასვამენ.

"ამ შემთხვევაში, ბატონი და ქალბატონი პრესის პრემიუმ ეკონომ კლასში სხვა ადგილას გადაჯდომა ვერ მოხერხდა, რადგან სივრცე სავსე იყო", — აცხადებენ ავიაკომპანიაში და ამატებენ, რომ წყვილთან მოლაპარაკება გრძელდება.