31 აგვისტოს მიხეილ მესხის სახელობის სტადიონზე ცნობილი ჯგუფის, Imagine Dragons-ის კონცერტი გაიმართა. კონცერტი კამპანია Starring Georgia-ს ფარგლებში ჩატარდა, რომლის თანაორგანიზატორი საქართველოს მთავრობაა.

კონცერტის მსვლელობისას ჯგუფის სოლისტმა დენ რეინოლდსმა მსმენელს მადლობა რამდენჯერმე გადაუხადა მასპინძლობისთვის და ისიც აღნიშნა, რომ გრძნობდა, ეს შოუ საქართველოში მომავალ მრავალთაგან პირველი იქნებოდა.

ერთ-ერთი პოპულარული სიმღერის, Demons-ის შესრულებამდე დენ რეინოლდსმა მენტალურ ჯანმრთელობასა და დეპრესიაზე ისაუბრა. მან მსმენელებს მოუწოდა, დახმარების თხოვნა არასდროს მორიდებოდათ და ისიც აღნიშნა, რომ დეპრესიას თავადაც ხშირად ებრძვის.

"ჩვენი მუსიკის მთავარი მესიჯი ძალიან მარტივია. ამ სცენაზე ვდგავარ, შემიძლია იმის კეთება, რაც მიყვარს და აქ ვარ, რადგან ადამიანები მეხმარებოდნენ. თუ თავს მარტო გრძნობ, თუ დეპრესიაში ხარ, თუ გგონია, რომ ცხოვრება არ გიღირს, გთხოვ, ეგ ფიქრები შენთვის არ დაიტოვო და დაელაპარაკე, მეგობრებს, ოჯახს და თუ შესაძლებლობა გაქვს, თერაპევტს.

შენს ცხოვრებას ყოველთვის აქვს აზრი. შენს ცხოვრებას ყოველთვის აქვს აზრი. გთხოვ, ჩვენთან დარჩი. ყველაფერი უკეთესობისკენ შეიცვლება. გპირდები, რომ მარტო აღარ ხარ. შეიძლება დეპრესია დაბრუნდეს. ის ჯერ კიდევ ჩემი ცხოვრების ნაწილია. დეპრესიას ყოველთვის ვებრძვი. ხანდახან უმიზეზოდ უარესდება და ბრუნდება, ყოველთვის ახსნა არ აქვს. ის უბრალოდ არსებობს. მაგრამ დარჩი ჩემთან ერთად ცოცხალი, რადგან ერთმანეთი გვჭირდება. სულ ესაა. ასეთი მარტივია. დარჩი ჩვენთან", — თქვა რეინოლდსმა და Demons-ის შესრულება დაიწყო.

მენტალური ჯანმრთელობის შესახებ წარმოთქმულმა სიტყვამ მსმენელების მოწონება დაიმსახურა, თუმცა მათი ნაწილი იმან გააკვირვა, რომ Imagine Dragons-მა კონცერტზე უკრაინას მხარდაჭერა არ გამოუცხადა და არც უკრაინისა და საქართველოს დროშები აუტანია სცენაზე.

სოციალურ ქსელში მომხმარებლები წერენ, რომ დროშების შეტანაში ხელს კონცერტის დაცვა უშლიდათ. ამის შესახებ კონცერტის ორგანიზატორებს კომენტარი ჯერჯერობით არ გაუკეთებიათ.