სულ მალე პერსი ჯექსონის რომანების მიხედვით გადაღებულ სერიალს ვიხილავთ. ჯერ-ჯერობით უცნობია დისნეის ახალი სერიალი, პერსი ჯექსონი და ოლიმპოელები, ეკრანებზე როდის გამოვა, თუმცა ტრეილერი საინტერესო სანახაობას გვპირდება.

"შერეულსისხლიანობა სულაც არ მინდა. ეს სახიფათო და საშიშია — უმეტეს შემთხვევაში, ამის გამო მოკვდები კიდეც. თუ ფიქრობ, რომ ერთ-ერთი ჩვენგანი ხარ, სანამ დრო გაქვს, უკან დაბრუნდი", — ამბობს ტრეილერში ჯექსონი და მაყურებელს დაძაბული სიუჟეტისთვის ამზადებს.

როგორც ტრეილერიდან ჩანს, სერიალი წიგნებში ასახულ სიუჟეტს მიჰყვება. ტრეილერში მთავარი პერსონაჟი საკუთარ თავს ისე გვაცნობს, როგორც სერიის პირველი წიგნის, მეხის ქურდის, დასაწყისში.

უკვე ცნობილია მთავარი გმირების შემსრულებელი მსახიობების ვინაობა. პერსი ჯექსონის როლში უოკერ სკობელს ვიხილავთ, ანაბეთს ლეა სავა ჯეფრისი ითამაშებს, გროვერს კი არიან სიმჰადრი განასახიერებს. ასევე, ზევსის როლს ლენს რედიკი ითამაშებს, პოსეიდონს კი ტობი სტივენსი განასახიერებს.