დემირელის სახელობის კოლეჯისა და მისი პარტნიორი სკოლების მასწავლებლები საქართველოს ხელისუფლებისგან დემირელის კოლეჯის დაკავებული მენეჯერის, მუსტაფა ემრე ჩაბუქის გათავისუფლებას ითხოვენ.

"საქართველოს სახელმწიფოს მიმართ გვაქვს თხოვნა. ერთსულოვანი ვართ ყველა ამ მოთხოვნაში, დაუყონებლივ გათავისუფლდეს, არ წარმოადგენს ეს ადამიანი საფრთხეს, თუ გარეთ იქნება. ჩვენ არ ვითხოვთ. ჩვენ არ ვითხოვთ სასამართლო პროცესის შეწყვეტას. დადგინდეს სიმართლე, სიმართლე დადგინდება და ყველაფერს დაერქმევა თავისი სახელი", - ამბობს ნოდარ ჭუმბურიძე, ნიკო ნიკოლაძის სახელობის სკოლა-ლიცეუმის კათედრის ხელმძღვანელი.

მუსტაფა ემრე ჩაბუქი თურქეთის მხარის მოთხოვნით საქართველოში 24 მაისს დააკავეს. ადვოკატის თქმით, ბრალდების თანახმად, მუსტაფა ემრე თითქოს ეხმარებოდა ერთ-ერთ ტერორისტულ ორგანიზაციას და ეს ორგანიზაცია მოხსენიებულია, როგორც "ფეთულა გიულენის მიმდევრები". კერძოდ, ადვოკატის თქმით, ბრალდების მასალებში აღნიშნულია, რომ მუსტაფა ემრე ჩაბუქს ბრალად ედება, თითქოს, ის ეხმარებოდა დემირელის კოლეჯის ერთ-ერთ პარტნიორს, რათა 2017 წელს გაესხვისებინა წილი ერთ-ერთ ამერიკულ კომპანიაზე.

მუსტაფა ემრე ჩაბუქს თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. მოსამართლემ პროკურატურის შუამდგომლობა დააკმაყოფილა. ხელისუფლებას ჩაბუქის გათავისუფლებისკენ და თურქეთისთვის არგადაცემისკენ მოუწოდა რვა არასამთავრობო ორგანიზაციამ.